Enero 4, 2015: Solemnidad sa Epipaniya sa Ginoo

Mga Pagbasa: Is. 60;1-6/Sal. 72/Ef. 3;2-3a,5-6/ Mt. 2;1-12

Nindot kaayo ang pamalandong nga gihatag ni Obispo Broderick Pabillo, SDB, DD. Siya ang nahimong Retreat Director namo. Iyang gihisgutan ang kalabut sa Inclusiveness ingon nga tema sa pagsaulog nato sa Solemnidad sa Epipaniya sa Ginoo. Kun maghisgot kita og Inclusiveness aduna kiniý kalambigitan sa pulong Malangkubon nga sa ato pa, malukpanon kaayo nga modawat ni bisan kinsa diha sa paagi sa paggakos.Kini nagpasabot nga ang mga personahe sa tulo ka mga maalamon nga nihalad og bulawan, insenso ug mira mga simbolo sa kamatuoran nga ang Dios alang sa tanan ug dili lang alang sa pipila ka mga sakop sa kaliwat o nasud. Ang Dios alang gyud sa tanan. Si Obispo Pabillo nagkanayon: "Inclusiveness is not only a privilege, it is also a challenge labi na diha sa pagsangyaw sa maayong balita ngadto sa tanang suok sa kalibutan. (Mateo 28;19-20). Kini usab ang hagit ni Papa Francisco nga ang Simbahan kinahanglang moadto sa mga kinasuokang bahin ug dili lamang makontento sa comfort zones niini. Dili lang paigo nga i-display ang maayong balita kinahanglan ang maayong balita ihatud gyud sa tagsa-tagsa ka mga pultahan sa tawhanong katilingban.