Pila ka oras human gibanlas ang kabahin sa dan paingon sa Dumlog Bridge sa Simala, Sibonga sa habagatang Sugbo, tungod sa bangis nga baha nga mugna sa bagyong Seniang niadtong Martes sa kadlawon, nahibawo nang mga opisyal sa munisipyo, Kapitolyo ug Department of Public Works and Highways (DPWH) sa kadako ug kadinalian sa panginahanglan paghimo og alternatibong agianan sa katawhan, mga sakyanan ug kargamento tungod sa kadako sa kadaot sa panginabuhi ug patigayon.
Apan gawas sa paghawan sa agianan alang sa gagmay’ng mga sakyanan wa silay laing gihimo. Gawas sa pagpahibawo nga unya na magsugod pagtukod og temporaryong puthaw nga taytayan liwas sa holidays. Morag mas mahinungdanon ang ilang bakasyon kay sa pag-alagad sa katawhan.
* * *
Tungod sa pangiyugpos sa gobiyerno, nakahunahuna ang pipila ka mga molupyo sa pagdalidali pagtukod og gamay’ng taytayan ginamit ang nipis nga tabla ug niwang nga kawayan. Daghang salamat nila nakaangkon ang natanggong nga mga pasahero og mas laktod nga agianan paglatas sa haw-ang tali sa Sibonga ug sa ubang kalungsoran sa habagatan.
Namantsahan ang ilang pagpakabana, nga angay gyong pasidunggan, kay gipangayoan nila og singko pesos ang matag moagi. May nanaway apan may nanalipod sab sa ilang pagpaningil. May nasubo sa pagkawagtang sa pagtinabangay apan may nidayeg sab sa katalagsaon sa patigayon. Apan nahimong pabilo ang kapakyas sa gobiyerno pagtuman sa iyang trabaho.
* * *
Ang paghinan-aw lang sa lokal nga mga opisyal, niapil gani og latay sa gamay’ng taytayan si Gobernador Junjun Davide, nagmatuod lang sa ilang katapolan ug kainutil. May mga inhinyero ug kahimanan ang munisipyo ug ang Kapitolyo pagtukod og mas lig-on nga footbridge samtang nagpaabot tang mahuman ang taas nga bakasyon sa taga DPWH.
Kun simbako magbaha na sab ang suba samtang naglatay ang katawhan sa gamay’ng taytayan, unsa man intawoy mahitabo? Ug kun way bahin ang lokal nga mga opisyal sa ilegal nga panguwarta, nganong wa man silang kabadlong sa bantang nga pangilkil?
* * *
Tangkod nang usa ka semana ugma sa pagkatanggong sa buses ug mga trak kay wa pa gyoy naablihan nga alternatibong agianan nila sa habagatang Sugbo. Pila na ka milyon ka pesos ang napilde sa wa mahatod nga mga pagkaon ug ubang kargamento ug labaw sa tanan sa kalangay ug kahasol sa pagbiyahe sa katawhan?
Klase ug trabaho na ugma human sa duha ka semanang bakasyon sa Pasko ug Bag-ong Tuig. Mas maghuot ug mas dugay’ng matanggong nga katawhan. Kun gisugdan pa unta dayon pagtukod ang steel bridge, kay naa man diay kahang tanang kahimanan sa wa pa si Seniang, inay sa pagsige lang og pagarpar pagsalimbong sa paglugway sa ilang bakasyon, mahuman na unta ugma ang temporaryong taytayan nga kaagian bisan sa labing dagkong mga sakyanan.