Rama ipakiha na ‘sab

Ireklamo na usab ni Atty. Reymelio Delute si Mayor Michael Rama tungod kay ang kuwarta nga alang unta sa pagpatukod sa Phase 1 project sa Cebu City Medical center (CCMC) gigamit sa mayor pagpanghatag og cash assistance sa mga senior citizens.

Awhagon ni Delute ang Office of the Ombudsman nga imbestigahon ang mao nga kaso ug kun may makita nga may igo’ng basehanan sa kalapasan ni Rama, pasakaan kini og kaso nga Technical Malversation ubos sa Article 217 sa Revised Penal Code.

Nagpasabot nga kun makakita og igo nga basehanan ang Ombudsman, kaso nga kriminal ang atubangon ni Mayor Rama nga hayan ipasaka adto sa hukmanan.

Unya, awhagon usab ni Delute ang Ombudsman nga sutaon kun mahimo ba nga mapasakaan si Rama og Abuse of Authority tungod kay wala man niya tumana ang gilatid sa balaod.

Ang gipasabot ni Delute mao nga gigamit ni Mayor Rama ang kuwarta nga alang unta sa pagtukod sa CCMC building aron ipanghatag sa cash assistance sa mga senior citizens apan wala kini pahimoi og “realignment” sa City Council.

Nakasabot ko nga tumong ni Mayor Rama nga wala niya pahimoi og realignment sa Konseho kay idayon man gayud niya nga ang P300 milyones itagana man gayud kini sa CCMC.

Nasabtan nako nga kay maikog man si Mayor Rama nga dili makahatag og dugang cash assistance sa mga senior citizens atol sa Pasko kay nihit lagi ang kuwarta, gigamit lang usa niya ang kuwarta kay wala pa man kini gamita.

Klaro kaayo ang tumong ni Mayor Rama nga kun makakolekta na og kuwarta ang dakbayan iya ra kini nga ilisan. Buyno, tan-awon lang nato kay si City Treasurer Diwa Cuevas miinsister man usab nga dili ilegal ang gihimo sa mayor.

Ang P300 milyones gud, orihinal g’yud kini nga gi-budget alang sa Drainage  Improvement Project, apan gipa-realign ni Mayor Rama alang sa pagtukod og CCMC building.

Ang gipasabot ni Cuevas nga ang kuwarta diha ra kini sa General Fund ug wala gayud mabutang og Trust Fund mao nga mahimo ra kini nga gamiton, apan ilisan lang.

* * *

Duna diay revamp ang City Hall department heads nga ipatuman ni Mayor Rama sugod sunod semana.

 Alegre ni. Asa na usab kaha madistino ang akong mga suod nga higala nga mga department heads. Apan sigurado ko nga si City Engineer Jose Marie Poblete magpabilin ra sa iyang puwesto ug si City Administrator Lucelle Mercado.