EDITORYAL – Peacetalks tali sa CPP-NDF?

Subling gibuhi ang planong sabot-kalinaw tali sa gobiyerno ug ang Communist Party of the Philippines (CCP) sa tinguhang matapos na kining kapin sa 40 ka tuig na nga insurhensiya sa mga walhong pundok.

Niadto lang Disyembre 26, gisaulog sa NPA ang ilang pagkahimugso. Sama sa gobiyerno, nanawagan usab ang mga lider sa CPP og kalinaw ug nagtinguhang padayonon ang nangapakyas nga peacetalks sa nanglabay nga mga administrasyon.

Apan ang CPP matud pa midemanda nga agi og pagpakita og maayong intensyon, kinahanglang buhian una ang magtiayon nilang lider nga sila si Benito ug Wilma Tiamzon nga nabalhog na karon sa prisohan human sila nadakpan sa habagatang bahin sa Sugbo sa miaging tuig.

Ang tigpamaba sa Malacañang nga si Edwin Lacierda miingon nga barugan sa gobiyerno nga walay kondisyones nga gipangayo sa CPP nga ilang tumanon bugti sa peacetalks ilabi na ang kabahin sa pagpagawas sa mga lider sa NPA nga nag-atubang og mga kasong kriminal sa korte.

Ang maong polisiya sa gobiyerno mao gihapong polisiya nga gipatuman dihang nakab-ot sa GRP-MILF ang Bangsamoro Framework Agreement nga maoy gilauman karong solusyon sa problema sa separitistang mga Muslim sa Mindanao.

Sa pagkakaron, pulos pa lang plano ang nanggawas nga impormasyon bahin peacetalks ug wala pa say kongkretong petsa kun kanus-a ug kun asa himuon ang peacetalks.

Sa mga nangaging mga pakyas nga peacetalks sa GRP-CPP-NPA-NDF ang Oslo sa nasud sa Norway maoy nahimong venue.

Apan ang dakong pangutana, mahinayon ba kaha kini?  Mosugot ba kaha ang gobiyerno sa gipangayong mga kondisyones sa CPP nga di mogawas nga huyang ug miluhod kini sa mga rebelde?

Unsa may naa kun buhian o dili buhian ang mga Tiamzon? Di ba makab-ot ang kalinaw?