Mahibulong ko ngano nga daghan man gihapon ang nangamatay sa hinay ra nga bagyo. Paminaw ko, kompiyansa ra g’yud kaayo mao nga sila nangamatay.
Gibalik-balik na sa mga sakop sa media, ilabi na sa mga magsisibya sa radyo sama kanako, nga kun ang balay anaa daplin sa kasapaan ug peligro nga matumpag, angay g’yud nga mohiklin.
Pananglit sa akong bahin, kun adunay bagyo nga taliabot ako na nga himoan og pagtimbang-timbang kun unsay angay nga buhaton pananglit moabot ug moigo na ang kusog nga bagyo.
Ang akong sakyanan, gikuha na nako gikan sa akong grahe nga nahimutang ilawom sa dako’ng kahoy ug didto nako gipahiluna sa hawan nga lugar.
Imposible man ‘sab nga dunay hangin nga lintuwaron niya ang kotse. Mas maayo na lang nga matuasan sa uwan kay sa matumbahan sa kahoy.
Ang mga bentana ug balkon gibutangan na nako daan og mga tabil nga aron dili makasulod ang uwan nga huypon sa kusog nga bahin.
Pananglit duna pa’y mas grabe pa nga panghitabo, kinahanglan nga nasayod ka na daan unsaon nimo pagbiya gikan sa balay ug kun asa ka mopaingon.
Sa laktud, kinahanglan nga gamiton g’yud ang atong utok aron malikayan nga mabiktima kita sa katalagman. Tan-awa karon, paet kaayo ang kahimtang sa kabanayan niini’ng mao nga mga tawo nga mosugat sa Bag-ong Tuig sa kamasulob-on.
Ang leksiyon nga makuha sa katawhan mao nga bisan hinay ra nga bagyo apan ayaw gayud pagkompiyansa. Tingali kompiyansa ra g’yud kaayo ang mga tawo kay 60 kilometros ra gud ang gikusgon sa hangin matag oras.
Naanad tingali sila niadtong Yolanda nga dul-an sa 300 kilometros ang gikusgon. Nakaingon tingali sila nga nakalahutay man gani ang ilang balay sa Yolanda ug Quennie, sa Seniang pa kaha?
Ang nakalahi sa Seniang mao nga hinay ra ang pag-uwan sa sinugdanan. Sa ato pa, ang tubig-uwan mituhop gayud ngadto sa yuta. Nagpasabot nga peligro pa gani kini sa dugang mga landslide mao nga kadto’ng mga namuyo sa dapit nga kanunay nga modahili ang yuta, pagbantay g’yud daan.
Ayaw huwata nga modahili na ang yuta ug unya pa kamo mohiklin. Wala ba kamo mahinumdom sa Guinsaugon, Southern Leyte nga dako’ng bahin sa bukid nahunlak og gatosan ka kinabuhi ang nakalas?
Ayaw ko’g ingna nga huwaton pa ninyo nga moanha sa inyong dapit si DILG Secretary Mar Roxas ug moagni kaninyo nga mamiya sa inyong gipuy-an sama sa iyang gihimo didto sa mga lumulopyo sa Samar atol sa bagyo’ng Ruby?