Nagkapuliki sa pagpangandam ang mga magtutudlo sa usa ka tunghaan alang sa pasundayag nga gipahaum sa Pasko. Ang pag-arte sa entablado kabahin sa pagkatawo ni Hesukristo ang himuon sa grade 1 pupil.
Ang tanang bata nahatagan na og parti sa maong pasundayag. Sila’ng tanan, malipayon nga nag-ensayo ug gihanas ang paglituk sa mga linya. Si John nga maoy giisip nga labing sipat sa klase, gihatagan og yano kaayo nga papel sa pasundayag.
Usa siya sa mga tag-iya og balay nga gitinguha ni Jose ug Maria aron mahimo’ng kapasilungan ug didto ipanganak ang manunubos. Sa way paglunga nga ensayo, wa’y sipyat si John sa iyang linya. ‘Wa nay lawak sa akong balay alang ninyo’.
Sa gabii sa pasundayag, naghinam-hinam ang tanan labi na ang mga ginikanan nga makakita sa ilang anak nga mohimo sa ilang tagsa-tagsa ka tahas. Ug sa dihang niabot sa punto nga nagsakit na ang tiyan ni Maria ug nagsugod na sa pagpanuktok sa mga balay nga ilang kasudlan ni Jose, gikulbaan na pag-ayo ang mga magtutudlo. Nabalaka sila nga basin magbinuang sa iyang papel ang sipat nga si John. Sa diha’ng niabot nga ang balay na ni John ang gituktok, dugay nga gibuksan ni John ang iyang pultahan.
Misamot ang kakulba sa mga magtutudlo nga basin laing pakulo na ‘sab ang himuon sa bata. Diha’ng gibuksan ni John ang pultahan gipangutana siya ni Jose kun aduna pa bay lawak alang nila.
Nagtanga ug wa’ katubag si John. Mitutok lang kini sa magtiayon. Sa ikaduha’ng pangutana, ‘aduna pa bay lawak alang sa akong nagbati nga asawa’?
Wa’ gihapoy gitubag si John ug nagtanga lang nga nagtan-aw sa sabak nga babaye sa iyang atubangan. Ang tanan gikulbaan labi na ang mga ginikanan ni John nga gipasigarbo ang ilang anak nga nakaapil sa maong pasundayag.
Sa ikatulong higayon, gipangutana si John kun aduna pa bay lawak alang ni Maria. Nitubag si John ug niingon, ‘Oo aduna pa. Dayon mo’.
Nahibawo ‘tang tanan nga sa pasungan sa mga baka gipahimugso si Hesukristo tungod kay wa’y nagpadayon nila. Sa maong pasundayag, nausab ang dagan sa sugilanon. Nausab ang tinuod nga script sa nahitabo kapin duha ka libo ka tuig na ang nakalabay. Yano ug lawom ang mensahe nga hatud ni John. Sa panahon sa Pasko, atong usbon ang script.
Kinahanglan nato’ng buksan ang atong kasing-kasing aron padayunon ang Ginoo sa atong tagsa-tagsa ka kinabuhi. Kini ang tinuod nga diwa sa Pasko. Ang pagpadayon sa manunubos sa atong tagsa-tagsa ka kaugalingon.
Email: ricolucena@yahoo.com or ricolucena@ilovecomarts.com