Mokabat na lang og 33 ka adlaw ug nia na sa nasud si Pope Francis. Ang santo papa nga naghatag og bag-ong nawong sa simbahan. Nakadani sa mga Katoliko sa pagbalik sa ilang pagsalig sa simbahan.
Nihatag og mga desisyon nga nakapausab sa pagtan-aw sa mga tawo sa liderato sa simbahan. Nibukas sa mga tawo nga labing gidaug-daog, gibiay-biay ug giyam-iran.
Ang santo papa nga maoy nakapaikag sa katawhan nga mobalik sa simbahang katoliko ug maoy naghatag og bag-o ug makakugang nga mga desisyon.
Si Pope Francis ang ikatulo’ng santo papa nga motunob sa nasud ug ang iyang mensahe sa kaluoy ug gugma ang sentro sa tema sa iyang kinatibuk-ang pagduaw.
Haum ang maong mensahe alang sa usa ka nasud nga bag-o lang nakasinati og mga pagsuway nga nisukod sa katakus ug pagtuo sa mga Filipino.
Labaw sa tanan, haum ang tema aron mabati sa mga biktima sa katalagman nga wa’ sila mag-inusara tunga-tunga sa mga pagsuway nga natagamtaman.
Ang labing dako’ng hagit karon mao ang pagpuyo sa gugma ug kaluoy human unya sa iyang upat ka adlaw nga pagduaw.
Usa ka dako’ng okasyon na ang pag-abot sa santo papa aron nga mahimamat ang lider sa katolikong simbahan gikan sa iyang misa didto sa Quirino grandstand sa kaulohan hangtud na sa misa niya sa tugpahanan sa Tacloban, mahimong mabati ug makita ang santo papa.
Kun ang uban nga mga katoliko mogasto aron lang makaduaw sa Roma ug makita ang santo papa sa personal, panahon karon nga ang santo papa na mismo ang moduaw sa nasud ug mohimamat sa mga Pinoy.
Karon ang tukmang okasyon aron ihimamat ang santo papa bisan sa pipila lang ka oras. Kun lisud nga duawon ang Manila tungod sa kahuot, kamahal ug ka impraktikal sa pagduaw sa dapit, mas haum nga duawon ang Leyte aron ubanan ang santo papa sa iyang biyahe.
Gikan sa Sugbo, daghang mga dapit nga mahimo’ng adto moagi paingon sa Tacloban. Mahimo’ng sa dakbayan sa Ormoc, sa Palompon, sa Hilongos ug lungsod sa Naval sa Biliran aron lang makaabot sa Tacloban.
Kun medyo sakripisyo man ang maong paagi, dili kana igsapayan kun ang usa ka tawo kansang mga nabuhat nakatarug sa pagtuong katoliko ug nakapadani sa mga tawo nga mobalik sa sabakan sa simbahan.
Mahimo man gani sa uban ang pagbiyahe sa kaulohan aron lang paghimamat sa mga international performer—ngano’ng dili man mahimo alang sa usa ka tawo nga nitay-og sa unsay naandan ug unsay gituohan nga husto.
(Email: ricolucena@yahoo.com or ricolucena@ilovecomarts.com)