Ngano nga dunay mga tawo nga subra ang timbang – simple lang ang hinungdan niini, kay sila naghinubra pud sa ilang pagkaon. Kini nagpasabot nga ang ilang lawas nagbaton og daghang inerhiya (calories) pinaagi sa pagkaon kay sa nagamit sa paglihok sa mga aktibidad o sa pag-ehersisyo.
Yano lang ang kamatuoran sa “energy equation” – nga ang mosulod nga kaloriya (calories), nga daghan pa kay sa ipagawas o gamitong inerhiya, musaka gyud ang timbang.
Kay ang subrang kaloriya nga di magamit anang adlawa, ideposito kini sa nagpundong tambok sa lawas, hangtud mobug-at.
Dili ang nanagkong bukog o sa gidak-on sa kaha o kuwadro sa lawas, nga maoy anaa sa hunahuna nato, nga maoy nakapatambok o nakapabug-at sa atong timbang. Sa praktikal nga termino, mahimong usbon ang “energy equation” pinaagi nga menusan ang gidaghanon sa imong mga pagkaon.
Apan gikinahanglan usab nga di masakripisyo ang kahimsog, ayaw usab ipaubos sa 1000 kaloriya basi’g maulser o masakit hinuon ka. Gawas lang kun naa ka ubos sa superbisyon sa doktor. Dali ra makalkulo nato ang igong kaloriya matag adlaw, basta masustansiyadong pagkaon bisa’g dili mabusog. Aduna kini rekisitos sa hustong kaloriya, nga nag-agad sa kahimtang sa lawas ug nagdepende pud kini sa edad, bata, babaye, lalake ug kun aktibo ba o dili o kasarangan lang ang aktibidad o trabaho. Kun ugaling subra kana gyud sa timbang, ayaw pakaliti og pagmenus sa kaon mo, kay ang imong metabolism mohinay, kay momenus man ang sugnod (fuel) nga kaloriya.
Bisitahe ang sentro sa barangay ninyo aron pag-monitor sa timbang mo nga matudloan usab ikaw nga makahibalo sa hingpit nga giya sa kaloriya.