Bagyo ug sunog

Gihulga na pud kita og usa ka super typhoon nga si Ruby. Gani dia na kini sa Philippine Area of Responsibility (PAR) ug mosubay sa rota nga gitadlas ni Yolanda.

Ang inyong kabomberohan anaa karon sa heightened alert status ug ang atong mga sakop sa Special Rescue Unit (SRU) naka standby aron motubag ug moresponde sa inyong mga tawag.

Aron hingpit ang atong pagpangandam, mas maayo siguro nga atong hinumdoman ang mga mosunod kun moigo ang usa ka dako’ng bagyo.

1.) Mahimong makasinati kita og brownout sa pipila ka adlaw o semana.

2.) Mahimong makasinati kita og walay suplay sa tubig.

3.) Giawhag ang tanan nga dili mopalit og fresh nga pagkaon kay useless ang refrigerator kun brownout, hinuon, pagpalit og mga de lata nga pagkaon. Kan-a ug luto-a daan ang tanang fresh foods para dili kini madaot.

4.) Pundohi og igong krudo o gasolina ang inyong mga sakyanan, sanglit wala may kuryente, dili kita makapatubil sa mga gasoline stations.

5.) I-charge ninyo ang inyong mga cellphones ug pagpalit og extra nga battery.

6.) Panglaba karon dayon. Unaha ang mga towels ug underwear.

7.) Pul-ongi ang mga sanga sa kahoy tapad sa inyong balay paglikay nga kini matumba.

8.) Mas dako ang risgo sa sunog pagkahuman sa bagyo tungod sa brownout, ug kun brownout, daghan ang mogamit og kandila. Kun duna kay fire extinguisher, i check kun may sulod pa ba.

9.) Pagpalit kamo og daghang garbage bags para itabon sa inyong mga electrical appliances aron dili kini mabasa sanglit motulo man ang atop kun kini madaot.

10.) Kun duna kamo’y mga anak, pagpalit daan og tambal sa ubo, sip-on ug hilanat

Ang inyong kabomberohan manghinaot nga mag-amping kita ug atong sundon ang mga sugyot aron nga mahingpit kita nga makalikay sa sunog ug sa bisan unsa man’g trahedya.