Managlahi ang weather forecast sa nagkadaiyang weather forecasting agencies dinhi sa Asya-Pasipiko kalabot sa bagyong Ruby nga mosud sa Pilipinas.
Ang Philippine Atmospheric Geophysical and Astronomical Service Administration (PAGASA) nga maoy weather forecasting agency sa Pilipinas adunay kaugalingong mga gamit nga may kapabilidad usab paghimo og tracking model sa bagyo.
Ang Pagasa, ug ang mga weather forecast sa Japan, South Korea, China, United Kingdom mibanabana nga si Ruby moigo sa Eastern Samar ug motadlas sa Central Visayas padung sa Western Visayas.
Apan ang Joint Typhoon Warning Center sa Amerika, posibleng mosud sa Bicol Region ang bagyo ug mosubay sa kabaybayonan niini lahos sa Metro Manila hangtud sa adlaw nga Martes.
Ang JTWC maoy usa sa gisaligang ahensya sa U.S. 7th Fleet dinhi sa Pasipiko, ang ilang forecast maoy hinungdan kun nganong way bisan usa sa ilang barko ang naabtan og mga bagyo sa usa ka lugar sa Pasipiko.
Apan wala kini magpasabot nga ang JTWC ra maoy sakto ug maoy mas angay nga tuohan nungka ang lokal nga Pagasa.
Angay hinumdoman sa publiko nga pulos lang kini pagbanabana, busa dili sila angay nga malibog kun asay tuohan sa managlahing mga forecast.
Ang tinuod, dunay umaabot nga bagyo ug kini magmugna og kadaot sa mga kabtangan ug kinabuhi. Di na angay problemahon pa kun kang kinsa gikan ang forecast.
Ang labing maayong buhaton mao nga inay nga manaway o mobasol sa Pagasa, mas maayong tumanon ang mga precautionary measures nga girekomendar alang sa kaluwasan sa tanan.