Ambot lang

Laing kinabuhi na usab ang nakalas human ang mga pintor sa usa ka edipisyo nga gitukod sulod sa Cebu Business Park nangatagak gikan sa ika-11 nga andana tungod kay ang kabilya sa scaffolding nga ilang gipatongan gabok.

Usa ang namatay human siya mideritso sa ubos samtang ang tulo buhi kay nangasangit. Tungod sa hitabo ang Office of the Building Official (OBO) mohimo og pakisusi sa dapit nahitaboan aron masuta ang hinungdan sa hitabo.

Uwahi na ang himuong pakisusi sa taga OBO kay aduna na’y namatay ug kun unsa man ang mahimo’ng resulta sa ilang imbestigasyon dili na kini makapabuhi pa sa kinabuhi nga nakalas tungod sa ilang pagpabaya.

Samtang ang taga Department of Labor and Employment (DOLE) padayon pa’ng naghagok sa ilang mga opisina ug wala gani mosuway sa paglili sa kahimtang sa mga construction workers nga namat’yan na.

Ang pagpatuman sa safety standards sa mga construction sites trabaho kini sa DOLE ug ang pagtuman sa mga specification sa construction ug uban pa ila usab sa OBO.

Sa kadaghan’g mitubo nga mga edipisyo dinhi sa Sugbo siyaro og wala makakita ang DOLE ug OBO sa panginahanglan ug demand sa ilang trabaho nga ila kini’ng adtuon aron mapanalipdan ang mga workers sa ilang mga amo nga mga contractors nga walay laing gihuna-huna gawas lang sa ginansiya nga ilang makuha sa ilang nasudlan nga kontrata?

Abi ko ba og nahigmata na ang OBO ug DOLE sa mga kaso sa mga anak sa singot nga nangamatay diha’ng natagak sila sa taas nga bahin sa gitukod nga building kaniadto duol sa SM ug sa Gaisano Capital sa Barangay Tisa. Wala diay gihapon.