Nag-trending sa social media ang mga politiko sa kauluhan nga nagpakita sa ilang mga gimik unsaon pag-promote sa ilang kaugalingon ngadto sa mga botante, kay hapit na man ang 2016 nga eleksiyon. Ang wala nako ganahi, adunay mga tawo nga mosaway sa usa ka politiko, apan dili gani makapasabot nganong dili nila masaway ang laing politiko nga mas klarong nangampanya og sayo bisan dili pa panahon sa kampanya.
Naglagot kong nagsud-ong ug nagbasa sa mga post ug comment sa Facebook nga nagdayeg sa gibuhat ni Bise Pres. Jejomar Binay nga nakigpangaon (boodle fight) sa Tabo-an ug sa pipila ka lungsod sa Sugbo. Unya ilang gisaway ang pagduaw ni DILG Sec. Mar Roxas sa mga lugar nga naigo sa bagyong Yolanda aron mang-apud-apod og mga hinabang ug ang pagsakay niini sa LRT sa kauluhan. Hinuon, sa ako nang giingon, dili mailad ang mga Sugboanon sa estilo ni Binay kay ang mga Sugboanon mobotar dili sa tawo nga nagpakiluoy ug makaluluoy, kun dili tan-awon ang iyang kapabilidad isip lider. Bisan gibugoan si Binay sa mga Sugboanon, walay epekto ang iyang estilo sa mga botante sa Sugbo.
* * *
Utro usab kining supporter ni Binay nga si Mayor Mike Rama, wala gyud hunahunaa ang epekto kun hapit na lang tanang karsada iyang ipakabkab.
Karong bag-o, hilabihang lisora pagpangita og agianan paingon o gikan sa SM City Cebu tungod kay ang karsada sa S. Osmeña wala pa gyud mahuman. Wala pa gani mahuman og kabkab duol sa barangay Tinago paingon sa Tejero, adunay kinabkabay sa karsada duol sa karaang edipisyo sa White Gold. Ang resulta, huot kaayo ang trapiko sa T. Padilla ug Imus. Ambot og kahibalo ba kaha si Mike niini nga sa akong tan-aw, wala ra man siyay pagtagad, basta lang matuman ang road concreting sa siyudad.
* * *
Sa national highway sa Lawaan, Talisay nanguhong ang mga mall nga miresulta sa grabeng pagkahuot sa trapiko. Pero akong nahibudngan nganong ang mga traffic enforcer sa Talisay tua magyampungad sa Cebu South Coastal Road, tagtinagutlo magbantay sa eskina aron manakop.
Kinsay sad-an sa trapiko?
Kun gi-anticipate pa lang unta sa mga opisyal sa Talisay, himuon unta nilang rekisitos sa pagbukas og mall ang “setback” gikan sa karsada aron adto mosulod ang mga PUJ, traysikol ug habalhabal nga sakyan sa mga pasahero nga manulod sa ilang mga mall. Kay walay setback, ang resulta, mohuot ang trapiko kun magsunod ang mga pribadong sakyanan pagpanulod, wala pa gyuy traffic enforcer sa karsada duol sa maong mga tindahan.