EDITORYAL - Nagpares si PNoy ug Barrack

Lisod kaayong sabton ang mensaheng buot ipaabot sa usa ka study group sa Amerika nga nagkomparar nila ni Presidente Benigno Aquino III ug ni US President Barrack Obama may labot sa kampanya   batok Islamic State.

Pwerte ra man layoa sa kalainan sa duha, gikan sa ekonomiya ug sa kapabilidad sa ilang mga nasud, labaw na kun ang hisgutan mao ang kampanya kontra terorismo.

Ang ISIS Study Group nga gilangkoban sa mga retiradong sundalong Amerkano way katungod aron itandi ang duha ka presidente base lang sa ilang mga gipanghimo ning bag-ong estilo sa terorismo.

Ang grupo nagkanayon nga si Aquino ug Obama pareho ra og pagtan-aw sa problema, ang duha gipasanginlang pareho nga mipakagamay lang sa hulga ang ISIS.

Kung si Aquino maoy tutokan, unsa man diay ang angay niyang buhaton? Mopadala og mga sundalo ngadto sa Middle East ug molusad og airstrikes?  Naglisod gani ang Pilipinas pagdepensa sa mga shoals ug atolls niini sa West Philippine Sea gikan sa China. Dili man ‘sab mahimong angkunon sa Pilipinas nga Filipino kadtong “Asian-looking” IS militant nga gi-post sa website sa maong grupo nga usa sa mga mipunggot sa 18 ka mga Syrian pilots ug sundalo nga nadakpan sa IS.

Ang Indonesia mismo mikompirmar nga ilahang kababayan ang maong lalaki sa video, gani duna na silay pangalan niini.

Dili ‘sab maayong mag-overreact ang Pilipinas sa mga nanghitabo sa ubang nasud tungod kay basin makasala kun masayop pagpataka og pasangil ug magkagubot na hinuon.

Samtang si Obama mimando man og airstrikes ug dayag kaayo nga mao kini nangulo batok sa IS didto sa Middle East. Di ba diay ni matawag nga aksyon batok sa IS?

Wa man siguro nagpabaya ang gobiyerno kalabot niining hulga sa ISIS, wa may record nga dunay pagpangatake sa ISIS dinhi.