Padayon nga nag-awhag ang Population Commission (POPCOM) nga unta ilakip sa mga subject sa eskuylahan ang “sex education”.
Kini tungod kay nakaamgo ang taga POPCOM nga 80 porsiyento sa mga Filipino, inosente kaayo bahin sa sex.
Kadaghanan nagtuo nga ang tawo pareho ra sa isda nga bisan pila ka milyon ang anak, wala’y obligasyon ang ginikanan sa kaugmaon sa ilang mga anak.
Apan sa tawo, angay masayran sa lalaki kun makig-sex siya og babaye posible nga siya makapabuntis, ug kun makapabuntis siya may ikapakaon ba siya ug ikapa-edukar sa iyang anak.
Ingon usab niini ang babaye, una siya makig-sex hunahunaon una niya pag-ayo kun makaayo ba sa iyang lawas ang iyang pagahimuon, o kun manganak siya may ikapakaon ba ug ikapa-edukar sa iyang anak ang mopaanak kaniya.
Kini ang angay itudlo sa mga magtutudlo sa ilang mga estudyante, ug dili kay tudloan pa nimo ang tawo pakighilawas kay kun kaantigo ang mananap niini nga way nagtudlo, mas bright pa ang tawo sa mananap.
Matag tawo may limit sa pagpakabuhi, apan una ka mobiya ning kalibotana, siguroa nga nakapalampos ka og kurso sa imong anak o mga anak.
Kun sa imong pagtuo dili makasapar ang imong kinitaan sa pagpalampos pag-eskuyla sa imong anak, ayaw pagminyo aron dili ka makapabug-at sa gobiyerno ug ubang mga tawo nga maproblema sa imo unya’ng patay-gutom nga mga anak.
Daghan baya nga misupak niini’ng sex education, sa pagtuo nga pulos lang bahin sa pakighilawas ang itudlo sa mga magtutudlo.
Ambot ingon ba kaha niini kagagmay og utok ang mga misupak sa sex education. (wencelen@yahoo.com)