Husto ang gibuhat sa korte sa pagkombikto sa siyam ka Chinese poachers tungod kay pagpakita kini nga sakop sa atong balaod ang Hasa-Hasa Shoal sa Spratlys sa West Philippine Sea.
Sila gidakop tungod sa pagpanguha og kapin 500 ka mga endangered nga pawikan.
Kinahanglang matanom sa alimpatakan sa mga Intsik nga ang Pilipinas mubarog diay bisan sa kagamay niini. Gikombikto ni Puerto Princesa RTC Judge Ambrosio de Luna ang siyam ug gipamulta og P4.3 milyones($100,000) matag usa tungod sa kasong poaching ug dugang P120,000 matag usa tungod sa pagpanguha og pawikan.
Onse ka mga mananagat nga luwan sa Qiongqionghai fishing boat nga nadakpan sa PNP Maritime Group niadtong Mayo ning tuiga. Duha sa mga crew ang gi-deport balik sa China tungod kay sila mga bata.
Apan kinahanglang di magkompiyansa ang Pilipinas tungod kay mahimong mobawos ang mga Intsik pinaagi sa pagsikop sa mga mananagat sa Pilipinas diha sa mga lugar nga di maabot sa proteksyon sa Philippine Navy, Philippine Coast Guard o PNP Maritime Group.
Seryusohon unta kini nga hulga sa panginabuhian sa mga mananagat sa Pilipinas. Dunay mas daghang barko ang China sa WPS ug duna sila’y forward outpost sa Spratlys nga makapadala og gagmay ug dagkong patrol boats aron gukdon ang mga Filipino.
Ning bag-ohay lang, midemanda ang China nga pabuhian nga wala’y kondisyon ang siyam nila ka mga mananagat.
Ang Chinese Foreign Ministry spokesman nga si Hua Chunying miinsister nga ilaha ang tibuok West Philippine Sea ilabi na ang Spratly Islands ug ang tanang nakapalibot niini. Pabiling nagmagahi ang China sa ilang pagpangangkon sa mga teritoryo sa Pilipinas bisan tataw sa mapa nga ang Spratlys layo ra kaayo sa ilang nasud.