Bisan buntog dili makabalik

Sa wala pa mokanaug sa iyang pagka gobernador sa lalawigan sa Laguna si ER Ejercito, giingnan niya ang iyang mga dumadapig nga "Atangi ang pagbalik sa Agila."

Apan mura’g bisan buntog dili makabalik sa Kapitolyo sa Laguna human ang Korte Suprema mipalig-on sa iyang disqualification sa bag-ohay lang niini’ng gipakanaug nga hukom sa kaso ni ER Ejercito.

Si Gobernador Ejercito gi-disqualify sa Commission on Elections tungod sa paggasto og subra sa gitugot sa Omnibus Election Code sa miagi’ng lokal nga eleksyon.

Nasuta nga ang gobernador migasto og kapin sa P20 milyones sukwahi sa gitugot nga kapin lang sa P4 milyones base sa gidaghanon sa ilang mga botante.

Sigun sa Omnibus Election Code ang mga kandidato sa lokal nga puwesto gitugotan lang sa paggasto og tag P3 sa mata’g botante. Apan sa kwentada sa Commission on Elections misubra sa gitugot nga kantidad ang gigasto ni Ejercito hinungdan nga ila kini’ng gi-disqualify.

Sa tanang kandidato, si gobernador ER Ejercito ang maingon nato nga pinakadimalas tungod kay sa ilang tanan siya ra ang nasakpan’g migasto og subra sa gisita sa Election Code.

Kun atong tinambanon sa pagkwenta dili lang si ER Ejercito ang nakalapas sa Omnibus Election Code kana tungod sa ka gamay sa kantidad nga P3 matag botante.

Panahon sa pagpangampanya dili ka makakita og P3 nga gastuhon sa kandidato alang sa mata’g botante kay ibutang ta lang sa pinobre, sa mga pulong-pulong nga himuon sa mga kandidato anaa gayud ang pan nga tag P5 na ang usa unya parisan pa ni og softdrinks nga sobra usab sa P5 ang prisyo.

Kadaghanan, kun dili man tanan, nakalapas sa Omnibus Election Code apan sa ilang tanan si ER Ejercito lang ang nasakpan. Puwerte’ng dimalasa.