Bata gidala sa amahan

Dear Atty. Divine,

Ang akong anak nga one-year old gidala sa akong partner sa ilang probinsya nga wa mananghid nako. Dili mi kasal ug duna kami usa ka anak. Sa dihang nag-away mi, iyang gikuha ang akong anak ug milarga sila sa Bohol. Akong gitawgan nga ibalik ang bata apan miingon siya nga dili na niya ibalik kay nagplano kuno ang iyang iyaan nga tua sa Amerika nga sagupon ang bata. Nahadlok ko attorney nga iyang ipasagop ang among anak ug dad-on kini sa Amerika. Unsay maayo nako nga buhaton aron makuha ang bata? Mahimo ba’ng ipasagop ang akong anak bisan di ko mosugot? –Lina

Dear Lina,

Ubos sa atong Family Code kun ang bata illegitimate, ang inahan mao g’yud ang adunay parental authority niini ug siya ang dunay katungod nga mo-custody sa bata. Apan tungod kay ang imong anak atua man karon sa iyang amahan mahimo mo kining bawion gikan kaniya pinaagi sa pagpasaka og reklamo ngadto sa barangay diin siya nagpuyo. Kun di mo mahusay sa barangay kay dili g’yud niya ibalik ang bata, mahimo ka nga magpatabang sa DSWD aron pagkuha sa bata. Kun dili g’yud gihapon niya ihatag ang bata bisan pa sa pag-intervene sa DSWD, then modangop na g’yud ka sa korte ug magkinahanglan na unya ka niana og abogado. Samtang kalabot sa plano sa imong partner nga ipasagop sa iyang iyaan ang inyong anak maglisud sila paghimo niini kay ang adoption nagkinahanglan og consent sa biological parents so magkinahanglan kini og pagtugot gikan kaninyo nga mga ginikanan. Apan kun pananglitan ila g’yud nga ipadayon ang adoption proceedings bisan og di ka mosugot then mahimo ka nga mosupak niini ngadto sa korte. – Atty Divine