Dili baya lalim kun pakauwawan ka sa mga komentaryo sa radio, pamantalaan, o kaha sa telebisyon ilabi na kun wala ka mangawat o kaha wala ka’y dautang nahimo sa imong isigkatawo.
Sama kang VP Jejomar Binay nga gituohan na hinuon sa kadaghanan nga tinuod siya’ng nakakuwarta og dako tungod kay wala kini mokibo sa awhag sa senado nga paatubangon siya sa imbestigasyon.
Kini bahin sa pasangil kaniya sa whistleblower kinsa mipakita og mga dokumento nga nakakuwarta siya og minilyon ka pesos nga komisyon gikan sa mga proyekto sa gobiyerno nga iyang gipatukod sa Makati City niadtong siya pa ang mayor.
Nagtuo g‘yud si Binay nga pakauwawan ra siya kun moatubang kay wala siya’y mga ebidensiya aron ipanghimakak ang mga pasangil batok kaniya mao nga bahala na og panitan, dili ug dili gayud siya moatubang sa maong imbestigasyon.
Apan si Talisay City Administrator John Yre delos Reyes kinsa napikal na sa mga pagdaot kaniya ug sa iyang amahan nga si Mayor JVR, mipasaka na og kiha batok sa usa ka komentarista sa radio kinsa nga nagpunay og latigo kanila sa iyang programa.
Mibahad si Delos Reyes nga iyang patagmon ang mga tawo nga padayon sa pagpakauwaw kaniya ug sa iyang amahan sa ilang pagdumala sa kagamhanan sa Talisay.
Aw hinuon, lahi si Delos Reyes ug Binay, kay ang bise presidente wala man sakiti sa mga pagdaut kaniya, samtang ang mga Delos Reyes gisakitan busa milihok aron sa pagpasilot sa mga tawong manamastamas pagdaut sa ilang dungog. (wencelen@yahoo.com)