EDITORYAL – Salbaron ang Visayan Sea Triangle

Upat ka gobernador sa Kabisay-an ang mihangyo kang Presidente Benigno Aquino III nga ideklarar nga protected area ang Visayan Sea Triangle.

Usa kini ka maayong lakang dili para lang sa mga gagmay nga mananagat kondili sa tibuok katawhan tungod sa pagkaong mahatag sa dagat. Ang Visayan Triangle nahimutang sa 23 ka mga munisipyo ug mga siyudad sa upat ka probinsya sa Visayas.

Sa pagkakaron, ang Bureau of Fisheries and Aquatic Resources mipatuman og mga fishing ban alang sa mga commercial fishing fleet sa nagkadaiyang bahin sa nasud. Kini aron pagsiguro nga di mahurot og kuha ang mga isdang maoy sagad kaunon sa tawo.

Angay sabton sa mga dagkong panagatan ang fishing ban tungod kay kini gitun-an og maayo sa mga eksperto sa BFAR  nga kanang mga bulana maoy tingpangitlog sa mga babayeng isda, mao nga kinahanglang di sila kuhaon, aron dunay mosunod nga mga isdang mahimo pang panagaton ini og libkas na sa fishing ban.

Epektibo kini kaayo nga pamaagi nga gihimo sa ubang mga nasud hinungdan nga dili na sila kaayo mopalayo sa ilang mga teritoryo tungod kay namentinar man nila ang fish stocks sa ilang kadagatan.

Samtang nindot kini og tumong, apan ang pangutana napatuman ba  sa BFAR ug sa ubang ahensya sa gobiyerno ang 100 porsiyentong fishing ban? Gi-monitor ba nila kada adlaw ang mga commercial fishing boats sa ilang mga hurisdiksyon?

Gawas pa niini, duna bay subsob nga kampanya aron mahunong na ang illegal fishing nga binuhatan sa mga gagmay nga mananagat sama sa paggamit sa mga active gears, dynamite fishing, cyanide fishing, fine mesh, ug uban pa?

Maayo unta og paminawon sa Malacañang ang hangyo sa maong mga gobernador tungod kay makaayo kini sa kinabag-an ug dili lang sa pipila ka mga negosyanteng nanag-iya og mga panagatan.