Nitokar na sang tapol
Nabantang na sang katapolan sa Philippine Institute of Volcanology and Seismology (PhiVolcs) sa ilang kapakyas sa epicenter sa linog nga nitay-og sa Sugbo ug Leyte niadtong Domingo sa gabii. Magnitude 3.8 ang linog nga niigo sa alas-9:38 sa gabii niadtong Domingo. Gihatag sa PhiVolcs ang coordinates sa epicenter sa linog: 10.55*N, 124.36*E.
Kay di man ang tanan may mapa nga makatultol sa coordinates, gihatag sa PhiVolcs ang ilang banabana sa dapit nga labing duol sa sentro sa linog: 58 km S 28* W sa Ormoc City, Leyte. Kon di ka magkuti-kuti, magtuo gyod nga Ormoc ang kinadul-an sa linog.
* * *
Apan daghang nag-text nako nga kusog ang tay-og nga ilang nabatyagan sa Camotes. Gipaka ingon nako nga kay atbang ra mang Ormoc ug Camotes, managsama tingali ang gikusgon sa ilang pagtay-og. Apan Intensity 1 ra ang nasukod sa PhiVolcs sa Ormoc. Sama ra kahinay sa tay-og sa Dakbayan sa Sugbo.
Gawas pa, ang 58 ka kilometro layo ra kaayo. Duna gyod tingali mga dapit nga mas duol sa sentro sa linog. Nagsugod na ko og duda nga, sama sa naandan, wa na sab magtagad ang PhiVolcs pagsuhid sa kinatibuk-an nilang mapa. Igo lang gisukod ang distansiya sa dapit nga labing pamilyar nila.
* * *
Gisusi nako ang website ang United States Geological Survey (USGS). Kay kasagaran mas detalyado ang ilang pagtultol sa mga dapit nga naapektahan. Apan wa nila maapil ang linog sa Sugbo ug Leyte niadtong Domingo sa gabii. Nalista hinuon ang mas kusog nga linog sa Surigao Del Norte sa Lunes sa kadlawon.
Maong nidangop ko sa Google Maps. Akong gipangita ang coordinates nga gihatag sa PhiVolcs (10.55*N, 124.36*E). Natinuod ang akong kahadlok. Mas duol ang linog sa Camotes ug ubang bahin sa Leyte kay sa Ormoc. Mahimong taga Ormoc ang naghimo sa earthquake bulletin. O gitapolan na lang paglista sa mga dapit nga mas duol sa epicenter.
* * *
Ang tinuod nga labing duol sa linog mao ang mga lungsod sa San Francisco, Poro ug Tudela sa Camotes. Ang labing duol nga yuta nga may ngan sa Google Maps mao ang Santiago Bay Beach. Sa bahin sa Leyte, ang Ormoc maoy kinalay-an. Mas duol sa sentro sa linog ang Inopacan, Hindang, Hilongos ug Baybay City. Ang Ormoc nahimutang sa pikas nga bahin sa kadagatan sa Camotes. Gani, mas duol pa gyod ang mga lungsod sa Isabel, Merida ug Albuera.
Mao ni dakong bentaha sa USGS kay sa PhiVolcs. Bisan tua ra sila sa layo ug igo lang nagtamod sa raw data nga nahipos sa monitoring centers sa PhiVolcs, mas kugihan sila nga molista sa tanang dapit nga labing duol sa linog.
- Latest
