Junta sa Magdalo gusto ni Binay

Kuyaw mag-atubang og kasong kriminal si Bise Pres. Jejomar Binay kun mamatud-an nga usa diay siya sa utok sa pakyas nga kudeta sa Manila Peninsula Hotel sa Makati niadtong 2007.

Nabisto kining maong isyu dungan ang kahadlok sa kampo sa United Nationalist Alliance (UNA) nga sa dili madugay, ipublikar ni Sen. Antonio Trillanes IV ang litrato sa mga sundalong Magdalo nga didto sa iyang aircondition nga baboyan sa Rosario, Batangas.

Mismo si Cavite Gov. Johnvic Remulla ang mitug-an nga gihatagan ni Binay og trabaho ang mga sundalong Magdalo sa Makati City Hall ug sa iyang baboyan human mapakyas ang mutiny sa Manila Peninsula ug Oakwood.

Si Trillanes usab ang miangkon nga mipasalig si Binay og suporta sa Magdalo sa sabot nga kun mapalagpot si kanhi presidente Gloria Macapagal Arroyo siya’y mamuno sa junta. Apan wala kini motuman sa iyang saad ug wala mosipot sa martsa paingon sa Manila Pen.

Kuyaw diay kini si Binay kay walay palabra de honor. Midungan ning isyuha sa paggawas sa desisyon sa Sandiganbayan Third Division nga adunay probable cause ang mga kasong malversation of public funds ug graft batok sa asawa ni Bise Pres. Binay nga si Dr. Elenita Binay mahitungod sa anomalosong pagpamalit sa P36 milyones nga hospital beds niadtong 2001 sa dihang siya pa ang mayor sa Makati.

Wala na gyuy naka-eskapo kanila. Hapit na silang tanang mga sakop sa pamilyang Binay ang nag-atubang og dili mga ordinaryong kaso kun dili mga kaso nga naglambigit sa pagpangawkaw ug pagpangawat sa kuwarta sa katawhan.

Sa Nobiyembre 20 na ang arraignment ni Dr. Binay alang sa kasong kalapasan sa R.A. No. 3019 ug duha ka count nga malversation ubos sa Article 217 sa Codigo Penal.

Hangtod karon, pabilin kong uyon sa baruganan nga maayong atubangon niya ang mga isyu ilabi na ang gipasangil nga overpricing sa P2 bilyones nga Makati parking building, kickback sa mga proyekto sa Makati, 350-ektaryas nga Hacienda Binay nga adunay de aircon nga baboyan, dili lang kay moingon nga ang mga akusasyon gituyo pagpung-ol sa iyang tsansa nga mapiling presidente sa 2016.

* * *

Dugay na unta kaayong kinahanglan, apan karon lang nakadesider ang upat ka mga gobernador sa Kabisay-an nga maghiusa aron ipadeklarar ni Pres. Aquino ang Visayan Sea Triangle nga protected area.

Uyon kaayo ko niini aron wala nay mga commercial fishing vessels nga makasulod 15-kilometro gikan sa baybayon aron mga gagmay’ng mananagat na lang ang tugotan. Tungod niini, kaprotehian ang kadagatan aron aduna pa kitay mapasa alang sa mosunod pa nga henerasyon.