Ang hulagway sa usa ka kapitan sa barangay nga giposasan ug gipublikar sa front page sa usa ka pamantalaan kaniadtong Martes, wala magpakita og kabalaka sa iyang kahimtang.
Aw hinuon isip otoridad ug amahan sa Barangay Bulacao, usa ka bayanihon ang iyang gihimo ni Kapitan Raul Cabañero alang sa mga negosyante og drugas sa maong lugar
Apan alang sa mga nabiktima sa mga buhat sa tiggamitan og shabu nga gitulis, gilugos, gipatay, ug gikawatan, ang gipakita nga kinaiya sa usa ka pinili sa katawhan maoy labing laksot, ug luod nga dili angay manakod.
Ang pagbalibad niya nga mo-witness sa raid batok sa mga tigpasiugda og kalihukan sa ilegal nga drugas maisip nga dili siya supak sa maong negosyo.
Apan alang sa mga nabiktima sa tiggamitan og ilegal nga drugas, ang maong kinaiya ni Cabañero angay nga pahamtangan sa bug-at nga silot tungod kay imbes mopakgang sa dautan, mipadasig na man hinuon.
Sa tibuok nasud kun ingon niini ang klase sa kadaghanang mga opisyal sa gobiyerno, hayan maluya ang mga otoridad sa pagsulbad sa nagkalainlaing kaso sa tulis, lugos, patay ug uban pan’g pintas nga krimen nga mugna sa mga drug addict .
Nasayud ba kamo nga ang mga drug addict karon maoy gikahadlokan sa taga bukid? Nga imbes ungo ang kaintapan nila kaniadto, karon mga drug addict na nga mounay ra og tulis sa ilang mga kadugo, mounay og lugos bisan ilang kadugo ug sa laktud mga drug addict na ang hari sa mga dautan karon sa tanang lugar.
Kun ang inyong kapitan ug ubang opisyal sa barangay molaban sa mga drug addict ug tagdumala og drug den, unsa may inyong buhaton kanila?