Natapos na ang pito ka adlaw nga Asia Pacific Economic Conference nga gi-host sa China nga gitambongan sa nagkadaiyang lider sa mga nasud naglakip kang Presidente Benigno Aquino III, US President Barrack Obama, Russian Federation President Vladimir Putin ug Japanese Presidente Shinzo Abe.
Nakahimamat ni Aquino si Chinese President Xi Jinping sud sa napulo ka minutos ug nanghinaut ang presidente nga mamahimo kining sinugdanan alang sa pagsinabtanay sa duha ka mga nasud sa pamaaging way mauwawan.
Ang China gipasanginlang migamit og pagpanghudlat aron pugsanong angkunon ang Scarborough Shoals sa Zambales bisan og layo na kini kaayo sa Spratly Islands nga giilogan usab sa duha ka nasud.
Ang baruganan sa Pilipinas nga pagsulbad sa kasungian sa mga maritime disputes pinaagi sa international law gisuportahan sa daghang mga nasud sa kalibotan.
Aron masugdan ang panag-uliay sa buot ug pagsinabtanay kinahanglang dunay tamdanan sama sa Code of Conduct nga dugay nang giduso sa Association of Southeast Asian Nations ngadto sa China.
Mao na kini karon ang usa sa mga sentro sa 25th ASEAN Summit sa Myanmar nga gihimo karong semanaha.
Ang pagdangop sa Pilipinas sa International Tribunal on the Law of the Sea usa ka paagi aron klaruhon ang mga baseline boundaries sa mga nasud nga nag-ilog.
Ang relasyon sa Pilipinas ug sa China dili unta maapektahan sa isyu sa WPS, tungod kay daghan pang mga butang nga maayo og kooperasyon ang duha ka mga nasud ug angayang palambuon.
Kini sama sa climate change, piracy, human trafficking, illegal drugs, health, economic activities, terorismo, food security ug uban pa.