Nagngisi nga migawas sa prisohan sa National Bureau of Investigation (NBI) si Talisay City ABC President Raul Cabañero human siya makapiyansa sa kaso’ng gipasaka batok kaniya.
Gikiha si Cabañero sa NBI tungod sa pagbalibad nga mo-witness kini sa gipahigayon nga ronda sa usa ka suyopanan og ginadili’ng druga sa Barangay Bulacao, diin siya ang kapitan, kaniadtong miagi’ng Sabado.
Ang NBI mipatagam ni Kapitan Cabañero human kini mipalabi sa pagduwa og mahjong kay sa pagsanong sa ilang hangyo nga makig-alayon kanila sa ilang pagpangronda.
Angayan ug makataronganon lang g’yud nga pakan-on og tagam si Kapitan Cabañero tungod sa pagpakauwaw sa iyang katungdanan.
Iresponsable ug dili angayang ipabilin sa iyang katungdanan ang gipili’ng pangulo sa mga kapitan sa dakbayan sa Talisay nga mipalabi sa sugal kay sa trabaho.
Kun ang mga kapitan sa dakbayan sa Talisay anaa pa sa husto nila’ng paminsar, karon dayon ilang pakanaugon sa katungdanan si Kapitan Cabañero isip pangulo sa ilang kahugpongan human siya mipintal og kadudahang baruganan sa kampanya batok sa ginadiling drugas ug sa iya mismo’ng pagkapangulo sa grupo sa mga kapitan.
Ang ngisi ni Kapitan Cabañero simbolo sa iresponsable’ng pangulo ug pabaga sa nawong sa opisyal nga giuna ang pagduwa og mahjong kay sa suliran sa ginadiling drugas.