Edukasyon pangandoy ni Engko Pedong

CEBU, Philippines – Adunay nag-ingon nga ang pagtaliwan sa hingpit ni kanhi Mandaue City mayor Alfredo Mendoza Ouano o Engko Pedong alang sa iyang mga suod nga mga higalang Mandauehanon daghan gayud sila og mahandom.

Matud pa nila ang ilang mahandom kang Engko Pedong dili lang sa unsa man ang iyang nahimong kalamboan sa Dakbayan sa Mandaue  sa pagpangatungdanan sa kagamhanan sa dakbayan  o ang iyang mga komedya nga makapabahakhak kanila og katawa.

Kun dili nalakip na usab diay niini ang iyang dakong tinguha nga pagpalambo sa kahimtang sa edukasyon  tungod kay  nakita man niya kaniadto nga ang  Mandaue nga usa industrialized nga dakbayan sa Sugbo apan ang  iyang kaigsoonang Mandauehanon sa mga pabrika nga ilang gisudlan nagbaton lamang kini sa ubos nga trabaho.

Dugang pa nila nga nakasulod man tuod og trabaho ang mga Mandauehanon sa mga pabrika nga gitukod sa Mandaue apan ang kadaghanan kanila kutob lamang sa pagka janitor, utility worker ug uban pa tungod kay ang kadaghanan wala magbaton og taas nga edukasyon kay dili man makasugakod ang mga ginikanan sa pagpatungha sa kolehiyo.

Daghan ang nakapahimulos nga mga kabus nga Mandauehanon sa maong programa ni Engko Pedong nga ang salapi gikan sa iyang kaugalingong bulsa nga  mao usab karon ang nakaaghat sa iyang apo nga si Konsehal Emmarie Lollipop Ouano-Dizon sa pagpadayon nga maoy gipaabot nga ang  300 ka   kabus  apan utokan nga kabataang Mandauehanon sa dakbayan maoy makapahimulos ubos sa gidala karon niyang programa nga “Edukasyon Mo, Pangandoy Ko”  program.

Gihimo na ni Konsehal Ouano-Dizon ang paglusad sa maong programa  pinaagi sa pagpirma og memorandum of agreement uban ni Ambassador Frank Benedicto nga maoy founder ug chairman sa  Benedicto College nga nahimutang sa dalan A.S. Fortuna sa Barangay Banilad sa maong dakbayan uban  sa kadagkoan sa maong tulunghaan ug ni  Bokal Thadeo Ouano  nga iyang amahan.

Matud pa ni Konsehal Ouano-Dizon  nga ang tanang kolehiyo nga nahimutang sa Dakbayan sa Mandaue anha motungha ang kabus apan utokan nga kabataan nga Mandauehanon nga  naglakip na sa University of Cebu Lapu-Lapu and Mandaue, University of the Visayas Mandaue City ug uban pa.