NOBIYEMBRE 9, 2014: Piyesta sa dedikasyon sa Basilika sa Letran
Mga Pagbasa: Ez. 47;1-2,8-9,12/Sal. 46/1 Cor. 3;9c, 11.16-17/Jn. 2;13-22
Kun maghisgot kita og templo adunay tulo ka templo sa Jerusalem kaniadto. Ang Templo ni Solomon, Templo ni Zorobabel, ug ang Templo ni Herodes. Ang templo mahinungdanon kaayo alang sa mga Judio. Kini ang ilang identity. Kini ang ilang kinabuhi. Sa laing bahin ang Templo usab nahimong sentro sa Ekonomikanhong Kalihukan. Mao kini ang hinungdan kun nganong daghan ang nihimo usab sa ilang patigayon didto sa dihang nagpakita sa iyang kapungot ang Ginoo. Kini tungod sa mga abuso. Ang templo dapit sa pag-ampo ug timaan sa presensiya sa Dios. Kun kini ang bili sa templo mao pud unta kini ang atong himoon aron mamahimo kitang makasulod sa presensiya sa Dios ug kita makasinati sa iyang presensiya. Balaan ang dapit ug ang nakapabalaan niini mao usab ang mga tawo nga nakighiusa sa Dios diha sa pag-ampo.