Editoryal - Anibersaryo ni Yolanda

Anibersaryo karon sa Super Typhoon Yolanda nga mikalas og 7,350 ka kinabuhi sa Kabisay-an ug nagbilin og dili makalimtang kasakit sa katawhan. Nakita ang pagka agwantador sa mga Filipino bisan sa tumang kalisod, apan kinahanglan nila ang tabang gikan sa gobiyerno aron mabalik sa normal ang ilang kinabuhi.

Kung bisitahon ang Tacloban City nga maoy labing naapektahan, daw wala pay gihimo ang gobiyerno bisan pa man sa binilyon ka pesos nga hinabang.

Wa pay usa ka semana dihang gipanghambog sa gobiyerno ang ilang libro sa Rehabilitation Master Plan. Mag-usa na ka tuig apan libro ray nahimo sa gobiyerno?

Padayong nagpuyo ang mga biktima sa tents, payagpayag nga ginama sa mga salin sa bagyo. Dunay uban nga gipasaligang makabaton og kaugalingong permanenteng balay apan kutob pa lang gihapon sa papel kay wala pa gihapoy nasugdan nga balay.

Nangalata ug nangadaot ang ubang mga hinabang ilabi na ang mga pagkaon apan hangtud karon wala pa hingpit nahaw-as sa kagutom ang mga biktima kay wala pa sila makabalik sa naandang panginabuhian.

Ang United Nations misaad nga dili pa sila mohunong  pagtabang sa gibanabanang 10 milyones nga naapektahan sa bagyo. Dunay international aid nga direktang gitunol nganha sa gobiyerno samtang duna say gipaagi sa mga non-governmental organizations.

Kung buot tan-awon, mas dako na ang agi sa NGOs nga daling miresponde sa panginahanglan sa mga biktima kun itandi sa nahimo sa gobiyerno.

Nakapahimo na sila og daghang mga balay ug livelihood projects samtang ang gobiyerno pulos lang gihapon pagarpar ang nahimo.

Minilyon ang gastos sa mga lakaw sa mga sakop sa kabinete sa Malacañang apan diay mga batang biktima sa bagyo nga wala gani klarong kaon, atop nga masilongan, seguridad gikan sa eksploytasyon  ug uban pa.

Dili na unta huwaton pa nga duna pay laingYolanda nga motiwas sa mga biktima aron sila molihok.