Takdo na nga usa ka tuig ugma human mikusokuso ang bagyo’ng Yolanda sa Kabisayaan nga mipatay og liboan ug mibanlas sa bilyones nga kantidad sa kabtangan. Kumusta na kaha ang mga apektado nga lugar?
Dili ikalimod nga hinay ang recovery effort sa national government. Gumikan lagi sa sige nga panagbingkil sa mga opisyal sa gobiyerno, walay klaro ang direksiyon sa rehabilitasyon sa mga lugar nga naigo sa mao nga katalagman.
Bisan pa ang gitukod ni Presidente Aquino nga task force nga maoy midumala sa rehabilitasyon piang sa pagpakusog sa recovery effort sa mga lugar sa Kabisayaan nga gidaro sa usa sa labing makusog nga bagyo sa kasaysayan.
Gani si kanhi senador Panfilo Lacson, ang Presidential Assistant for Rehabilitation and Recovery, ang miadmiter nga kulang gayud sa pundo ang kagamhanan alang niadto’ng mga biktima sa mao nga bagyo.
Hinuon sa ka dako sa lugar nga apektado ni Yolanda, dili madali ang rehabilitasyon. Apan tungod kay gisakyan man sa pulitika sa uban, misamot na hinuon kahinay ang pagbangon sa milyones nga mga biktima.
Maayo na lamang kay abtik ang internasyonal nga komunidad ug mga non-government organization nga nakaresponde human sa paghapak sa mao nga bagyo. Kay kun wala pa sila, samot na nga nagkamang ang rehabilitation effort.
Hangtud karon, ang tabang (salapi man o mga relief goods) gikan sa mga international donor ug sa private sector padayon nga mibubo ngadto sa mga biktima ni Yolanda. Dako kaayo ang ato’ng pasalamat niini.
Samtang ang ato mismo nga kagamhanan ania nagkapuliki pa og pangita og pundo alang sa dako nga recovery drive. Ug tungod sa walay klaro nga sistema, walay klaro usab ang distribusyon sa mga hinabang.
Gani, pipila ka local government units ang mireklamo gumikan kuno sa hinay nga hinabang gikan sa national government nga miabot sa ila’ng mga lugar. Kini bisan pa man kun usa ka tuig na human ang mao nga trahedya.
Kini’ng tanan nagpakita lamang nga kulang gayud sa kaandam ang ato nga kagamhanan sa mga kalamidad ug nga magsalig gihapon kita sa mga hinabang gikan sa gawas ug sa pribado’ng sektor. Apan dili na kita matingala niini.