Ang tinuig nga pangilin sa Birhen sa Regla

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Daghan  ang nanghinaut nga mahimong labing mabulokon ang pagsaulog sa tinuig nga pangilin sa Birhen sa Regla karong Nobiyembre 20 niining tuiga ug dili mahisama sa miaging tuig nga kasaulogan.

Gitataw nila nga bisan kun wala makahatag og dakong epekto ang 7.2 magnitude nga linog nga miigo sa Sugbo sa Oktubre  15 ug ang bagyong Yolanda sa Nobiyembre 8 sa miaging tuig apan naapektohan usab ang kasaulogan sa  pangilin sa dakbayan sa miaging tuig kay  mibati man ang mga Oponganon sa mga biktima sa maong katalagman.

 Nunot sa maong kasaulogan karong tuiga  maoy gihimo karon ang pagpangandam sa nagkadaiyang kalihokan alang sa maong kasaulogan karong tuiga nga naglakip na sa gikatakda nga fluvial procession sa Nobiyembre 12 niining tuiga nga mao usab ang pagsugod sa unang gabii sa novena.

Dugang pa nila nga nag-una sa pagpasiugda sa maong kalihokan ang Lapu-Lapu City Tourism Commission uban sa pag-abag usab sa mga sakop sa Philippine Coast Guard, Philippine Air Force, Philippine Navy, Philippine National Police, religious group ug uban pa.

Ang fluvial procession nga pagahimuon karong tuiga maoy gipaabot ang pag-apil sa mga nanag-iya og sakyanan sa kadagatan alang sa maong kalihokan sanglit pagahimuon man kini pinaagi sa indigay kay magpili man og labing maayo nga pagkabutang sa mga  dayandayan niini.

Matud pa nila nga daghan ang nanghinaut sa maayong panahon sa adlaw sa maong kasaulogan alang karong tuiga sanglit daghan man sa mga Sugbuanon nga nagpuyo na sa nagkadaiyang lalawigan nga moanhi sa Sugbo. 

Dili lamang sa pagpamista kun dili sa pagtuman sa ilang mga saaran sa pagyukbo sa Birhen sa Regla sa pagpasalamat sa mga grasya nga ilang naangkon.