Pipila ka tuig sa wa pang Yolanda, inilang magtutudlo sa Sugbo nagsublisubli pag-awhag sa iyang kaubanang mga magtutudlo sa pagpahinumdom sa mga tinun-an ning bililhong pagtulon-an: Pagpalambo sa kinaiyahan ug pagpanalipod sa kakahoyan. Maong usa sa mga sakop niyang magtutudlo nakugang sa pagpamutol ni Naga City Mayor Val Chiong sa dul-an sa gatos ka punoan sa kahoy aron mahawan ang luna nga tukoran og oval.
Inahan ni Mayor Chiong ang ilang superintendente sa kanhi Department of Education, Culture and Sports (DECS). Napakyas bang inahan pagtudlo sa iyang anak? O tungod sa gahom hingpit nang gisalikway ni Mayor Chiong ang bililhon nga pagtulon-an sa iyang inahan?
* * *
Di lang pagtulon-an sa inahan ang nakalimtan ni Chiong. Mahimong nataligam-an sab hasta ang opisyal nilang awit sa Naga. Magtutudlo sa Naga nga aktibo pa sa serbisyo wa kapugong paghilak dihang nasaksihan ang pagluba sa mga punoan sa Narra ug ubang kahoy nga giisip nga babag sa proyekto sa mayor. Kay mao gyoy nisantop sa iyang hunahuna ang unang mga linya sa “Naga Hymn” nga ilang giawit uban sa mga tinun-an matag pataas sa nasudnong bandila:
“Ikaw ang Narra nga simbolo sa katilingbang Nagahanon. Ug sa tanang panahon magpabiling lig-on ug malambuon.” Nipahinumdom ang mahigugmaon sa kahoy nga si Engr. Roger Pepito, kun simbako nakalimot na sab si Chiong, nga Naga ang Binisaya sa Narra.
* * *
Ang napilian ni Chiong nga tukoran sa bag-ong oval mao ang luna nga may karaan nang oval. Nga segun sa nagpakabana nga mga magtutudlo ug mga ginikanan may igo nang gidak-on. Kay nahimo na mang venue sa Palarong Panlalawigan atol sa pamunoan ni kanhi mayor Paul Ong.
Ambot nganong wa gyod kapangita og laing luna o mas mapuslanon nga proyekto si Chiong. Ambot unsay atraso sa mga kahoy. Siya say labing apurado nga putlon nang nahibilin sa 88 ka kahoy gikan sa Naga paingon sa Carcar nga gisentensiyahan og kamatayon sa Department of Environment and Natural Resources (DENR).
* * *
Nakabatyag ang katiguwangan sa Naga nga gibudhian silang Chiong. Kinsa pila ka tuig ang nilabay maoy nangu nila sa pagprotesta batok sa higanteng pabrika sa semento. Niadtong higayona nakumbinser silang Chiong nga angay silang makigbisog pagpanalipod sa kinaiyahan alang sa mas sanag nga ugma sa kabataan sa Naga.
Nahimong mas hapdos ang pagbudhi kay natunong ang pagpamutol sa mga kahoy dayong timaan sa unang anibersaryo sa super typhoon Yolanda. Kansang kaliboan ka biktima sa silangang Kabisay-an nihinumdom nga dagkong mga punoan sa kahoy nga ilang gikapyotan maoy nakaluwas nila gikan sa bangis ug higanteng storm surge. Hinaot nga di maangin sa pataka ni Chiong ang inosenteng mga Nagahanon sa gikahadlokan nga mas pintas nga bawos sa kinaiyahan.