Dear Atty. Divine,
May kabilin nga yuta ang among ginikanan ug wala pa kini namo ma-subdivide sa akong mga igsuon. Matag tuig mag-contribute mi alang sa buhis sa maong property ug sa uban pa’ng bayranan alang sa maintenance apan niay usa namo ka igsuon nga dili g’yud mutampo sa mga bayranan. Mahimo ba ni namo siya’ng di bahinan? Unsa may maayo namo nga buhaton ani niya? Daghang salamat. - Ramonito
Dear Ramonito,
Obligado g’yud mo sa paghatag og bahin sa inyong usa ka igsuon sa kabilin sa inyo’ng ginikanan bisan kun dili siya mutampo sa mga bayranan sama sa buhis tungod kay ang anak compulsory heirs kana base sa balaod ug dili mahimo’ng hikawan sa iyang bahin. Ang maayo ninyo’ng buhaton mao ang pagsulti kaniya sa iyang mga obligasyon isip co-owner ug kun dili gani g’yud siya mohatag sa iyang share sa buhis adto ninyo i-deduct unya sa iyang mahimo’ng bahin sa maong property. Mas maayo ‘sab nga inyo’ng itago ang mga resibo sa inyo’ng gibayran nga buhis ug uban pa’ng gasto sa maintenance sa maong property aron naa mo’y basehan sa pagpaningil kaniya. Hinaut nga akong natubag ang imong mga pangutana. Thanks and God bless. - Atty. Divine
Alang sa inyo’ng pangutana ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules ug Domingo.