Adlaw karon sa mga minatay ug samtang ang tibuok nasud nag-obserbar niini, usa ka magbabalaod gusto ipaimbestigar ang death care industry kay kuno mahal na kaayo ang gastuon kung mamatay.
Sakto si Kabataan party-list Rep. Terry Ridon, dako na gayud tinuod ang gastuon kung mamatay. Huna-hunaa ra gud og tagpila na ang pinakabaratong lungon. Unya itandi kini sa pinakamahal nga lungon nga muabot og milyones ang kantidad! Tagpila ang pinakabaratong nitso o luna sa minteryo? Ug dili lang diha nahuman ang galastuhon. Bisan gani ang pagpasuga sa mga nitso sa panahon sa adlaw sa mga minatay mahal man gani.
Matud pa ni Rep. Ridon, samtang nagkamahal ang gastuon sa haya ug pagpalubong, duna usab mga funeral parlor nga maghimo'g kabuang, sama na lang sa pag-claim og mga patay’ng lawas sa mga ospital ug pag-embalsama niini bisan wala'y pagtugot sa mga tagtungod. Kay na embalsama na man, ipalukat na dayon sa funeral parlor ang patay’ng lawas sa mga tagtungod niini.
Midugang si Rep. Ridon nga tungod kay dako ang gastuon sa paghaya ug pagpalubong, mapugos ang mga tagtungod pag-extend sa haya aron makadawat pa og dako-dako nga limos.
Tungod sa kadako sa gasto sa haya ug pagpalubong, nahimo gud nga dakong negosyo ang pagpamaligya og life insurance kung diin magbayad na ka daan sa funeral services inig abot sa imong kamatayon o ba kaha sa imong pamilya.
Kinahanglan na gayud i-regulate ang death care services aron dili na makapatuyang og pataas sa presyo ang industriya.