VECO mitabang sa Mandaue Police Ang

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Gipakita sa Visayan Electric Company (VECO)  ang ilang pagkamatinabangon aron pagpalambo sa kahapsay ug kalinaw sa Dakbayan sa Mandaue pinaagi sa pagdonar og 10 ka collapsible outpost ngadto sa kapolisan.

Gihimo ang turnover ceremony sa gidonar nga mga butang ngadto sa Mandaue City Police Office (MCPO) nga nagkantidad ang matag usa og P12,500.

Nangulo sa pagtambong sa kalihukan mao si Sebatian Lacson nga maoy chief operation officer sa VECO ug gikuyogan siya sa uban pa nga kadagkoan sa  kompaniya.

Si  Senior Superintendent  Petronelli Baldebrin nga maoy direktor sa kapolisan sa MCPO maoy nangulo sa pagdawat sa maong butang ug gisaksihan usab kini ni  Konsehal Demetrio Cortes Jr. nga maoy chairman sa committee on police, fire and penology sa konseho.  

Matud ni Lacson nga ang ilang pagtabang sa kapolisan pinaagi sa pagdonar og 10 ka collapsible outpost  maoy ilang pagtabang sa kapolisan sa ilang pagpatuman sa kahapsay ug kalinaw sa dakbayan.

Gitataw ni Lacson nga nagkantidad ra kini og P12,500  matag usa ka collapsible outpost kay wala man sila makagasto sa materyales kay gikan man kini sa ilang recycle nga mga butang sama sa mga kahoy ug mga sin nga giatop niini.

Dugang pa ni Lacson nga ang ilang pagtabang sa kapolisan sa dakbayan maisip nga kabahin lang sa uban pa nga mga tabang nga ilang gihimo sa Dakbayan sa Mandaue sanglit ang nag-una mao man ang  pagtukod og mga lawak saringan  sa mga tunghaang publiko.

Si Senior Superintendent Baldebrin mapasalamaton sa kadagkoan sa VECO sa ilang pagdonar sa maong mga collapsible outpost.

Gipasabot niya nga ang collapsible outpost ilang ipahimutang sa mga dapit nga sagad mahitabo ang krimen nga kapasilongan sa ilang sakop nga madistino sa maong dapit.

Samtang si Konsehal Cortes miingon nga ang collapsible outpost makatabang kaayo sa kapolisan sa gipatuman nga police visibility sa tumong nga kapanalipdan usab ang katawhan.

Dugang pa niya nga ang panalipod sa kinabuhi ug kabtangan sa katawhan maoy kaakohan sa kapolisan apan nagkinahanglan usab kini og pagtabang sa kumunidad aron kini mahimong malampuson.