Malipayong pasko!

Dako g’yud kaayo’g ngisi ang mga Pinoy kun hingpit na’ng ipatuman ang balaod nga bag-o lang giaprobahan sa Senate Ways and Means Committee nga maghatag og tax exemption sa Christmas bonus.

Malakip unya sa dili malaslasan og buhis ang magdawatan og Christmas bonus nga P75 mil paubos. Wa’ na sa’y ipahamtang nga buhis alang sa 13th month pay.

Kung hingpit na kini nga ipatuman, kini ang usa sa labing maayo’ng pinaskuhan sa administrasyong Aquino ngadto sa mga trabahador. Mas merry ang pasko sa mga Pinoy nga makadawat sa tibuok g’yud nga kantidad sa Christmas bonus ug 13th month pay.

Sa pagkakaron, kadto’ng nagdawatan og Christmas bonus nga P30 mil pataas, laslasan og buhis sa gobiyerno. Hinungdan nga daghan sa mga empleyado sa gobiyerno ug pribadong sektor ang magkusnot ang agtang inay malipay.

Apan sa Senate Bill 2437 nga gipangamahan ni Senador Ralph Recto, dili na mokuha og buhis sa modawat og P75 mil paubos nga Christmas bonus ug 13th month pay. Hinuon, magkahulogan kini nga P2.6 billion ngadto sa P5.6 billion nga buhis ang maiban sa kitaon unta sa kagamhanan.

Apan dili maayo’ng isipon nga pildi ang gobiyerno ning maong lakang ni Recto. Dili mawala ang binilyon ka pesos gikan sa atong panudlanan tungod kay kun imong tan-awon, dili idagan sa mga kawani sa gobiyerno ug pribado’ng kompaniya ang ilang madawat nga bonus.

Dili ‘sab mahimo’ng ilubong sa yuta ug itago sa baol ang ilang madawat nga pahalipay karong pasko. Ang mahitabo mao nga igasto ra gihapon sa mga Pinoy ang ilang madawat nga bonus, labi pa nga daghan og mahimo’ng mapalit karong pasko.

Kay gastohon ra man gihapon ang ilang tax-free nga Christmas bonus, makuwartahan ra gihapon kini sa kagamhanan nga makakolekta man gihapon sila og Value Added Tax sa matag palit og gadgets, pagkaon ug uban pa.

Bisan ang pagkaon nga gamiton alang sa Noche Buena ug Media Noche pulos adunay buhis nga gipahamtang ang gobiyerno. Kun sumadahon, mobalik ra gihapon sa gobiyerno ang mawagtang nga binilyon ka pesos nga kita unta gikan sa bonus.

Kun ingon niini lang unta ka bukas ang panghuna-huna sa atong mga opisyal sa gobiyerno, pagka malipayon siguro sa pasko. Ug kun mahitabo nga tax-free na ang Christmas bonus sa Pilipinas, makadugang kini sa interes sa mga empleyado nga motrabaho ug mohimo sa ilang responsibilidad tungod kay sa katapusan sa tuig, tax-free nga bonus ang ilang madawat.  Kini ang makalipay nga pinaskuhan.

* * *

(Email: [email protected] or [email protected])