EDITORYAL - Init ang election sa SK

Ang mga lider sa Bando Osmeña Pundok-Kauswagan (BOPK) ug Team Rama pareho nga nangangkon nga dili nila ilambigit sa hugaw nga pamolitika ang mga batan-on atol sa ipahigayon nga Sanguniang Kabataan (SK) elections karong Pebrero 21 sunod tuig.

Kanindot kun kini ang mahitabo apan walay motuo sa ilang pamahayag nga dili mag-apil-apil ang mga lider sa duha ka politikanhon’g grupo pagpili og mga chairmen sa SK sa lainlaing barangay dinhi sa dakbayan.

Ubos sa lagda, ang 80 ka mapili nga chairmen sa SK sa kabarangayan sa dakbayan sa Sugbo mopili usab og ilang presidente sa Sanguniang Kabataan Federation nga molingkod isip ex-officio member sa Cebu City Council.

Sigurado nga ang BOPK ug Team Rama maninguha gayud nga daghan ang modaog nga SK chairmen diha sa kabarangayan nga alyado sa ilang grupo aron nga ila nga supporter ang mapili nga presidente sa SK Federation.

Ang BOPK dunay siyam ka konsehal nga ilang alyado diha sa City Council ug walo lang sa Team Rama. Sigurado nga ang Team Rama maninguha g’yud nga ang SK president ila aron nga kun molingkod na sa konseho patas sila ug ang BOPK nga tag siyam ka konsehal.

Kun mahitabo kini, modaog na kanunay ang Team Rama kun adunay botasyon kay ang bise mayor nga maoy presiding officer moapil na man sa pagbotar aron pagbuak sa patas.

Asa man diay mobotar ang bise mayor nga siya alyado man sa Team Rama, adto diay siya sa BOPK?