Badlungon nga Santo Papa?

Kini maoy pagtan-aw sa pipila ka tawo nga nagpalibot kang Pope Francis tungod kay sa makadaghan’g higayon iyang gisupak ang protocol sa Vatican.

Nagdumili siya sa pagpuyo sa Apostolic Residence nga maoy opisyal nga puy-anan sa mga Santo Papa. Mas gipili ni Pope Francis nga mopuyo sa gitawag nga Castel Gandolfo kauban ang mga opisyal sa Vatican ug makigsawo sa pagkaon sa mga empleyado.

Sa makadaghan’g higayon iyang giadto ang mga Swiss Guard nga nagbantay kaniya adlaw ug gabii ug giawhag nga pakatulgon ‘sab.  Nagdumili ang mga guwardiya kay ila man nga trabaho nga bantayan g’yud ang Santo Papa mao nga gipadad-an na lang sila og kalingkoran.

Nakugang ang kalibutan diha’ng nakighimamat usab sa mga batan-on ang Santo Papa sulod sa St. Peter’s Basilica ug nakipag-selfie kanila.  Nihunong usab ang Santo Papa sa grupo sa mga residente sa Roma nga nagda’ og placards isip paghangop lang unta sa iyang pag-agi sa dapit.

Imbes mulahos lang, nihunong ang Santo Papa ug nakighimamat sa mga tawo nga nakapakugang sa iyang close-in bodyguards. Daghang okasyon nga nitawag sa telepono ang Santo Papa.

Kining tanan dili mahimo sa mga nangagi nga Santo Papa. Ang tanang lihok sa lider sa simbahang katoliko, kinahanglan nga mosunod unta sa tukma’ng protocol.

Kun tan-awon, usa ka badlungon ang Santo Papa alang sa mga tawo nga nagpalibot kaniya kay nagdumili siya sa pagsunod sa unsa’y tukma nga lakang aron kaprotehean ang iyang seguridad ug sundon ang unsay naandan.

Apan kini’ng tanan, gihimo sa Santo Papa aron paghatag sa usa ka lanog nga mensahe nga mahimo ra diay nimo’ng ang tanan basta nabutang lang sa tukma’ng punto.

Ang intensyon ra g’yud sa Santo Papa nga iyang himuon ang mga butang nga alang niya makaayo ug makapalipay sa mga tawo labi na sa mga tawo nga wa’ gyud magdahom nga iya kini nga himuon.

Sa giingong pagka-badlungon ni Pope Francis kun protocol ang hisgotan, gilauman karon sa mga Sugbuanon nga iyang paboran ang pagduaw sa Sugbo atol sa iyang pag-abot sa nasud karong Enero.

Ang maong matang sa gawi nga mosimang sa unsay nasabotan, ang nagpabiling bukas nga aspeto aron nga mahatagan og katumanan ang usa ka butang nga gihangyo sa  mga Sugbuanon. Walay nahibawo nga ang iyang gihimo nga pagsupak sa protocol, iya ‘sab nga himuon diri  sa nasud.

* * *

Email: [email protected] or [email protected]