Mapugos na pag-atubang

Sa kataposan, nanubag na og mga pangutana si Bise Presidente Jejomar Binay sa mga pasangil sa pangurakot ug tinagoan nga katigayonan batok niya ug sa iyang pamilya. Apan, sama sa naandan, wa gihapon siyay klaro.

Sa gikahinaman nga pakighinabi niyang Lynda Jumilla sa ABS-CBN News Channel (ANC), si Binay wa nang kahinumdom pila ka ektarya nga luna ang iyang napalit sa Rosario, Batangas (ang giingong nahimutangan sa 350 ka ektarya niyang asyenda) alang sa iyang baboyan nga gibutang sa ngan sa JCB Farms dayon sa Agrifortuna. Apan pagkataudtaod sa samang interview nideklarar na sab si Binay nga wa diay siyay gipanag-iya nga luna sa Rosario, Batangas.

* * *

Wa katabang pagpatin-aw sa misteryosong pagpanag-iya sa luna sa Batangas ang Munisipyo sa Rosario kansang mayor, si Manuel Alvarez nga sakop ni Binay sa United Nationalist Alliance (UNA), niinsistir nga way gipanag-iyang luna si Binay. Nipagawas og mga dokumento ang munisipyo nga niila sa mosunod nga maoy rehistradong mga tag-iya: Maria Guico, Renato Comia, Lynette Desphy, Murielle Desphy, Maximillian Desphy, Hilario Comia, Balbino Perez ug Benito Alday.

Apan usa nila, si Maria Guico, nahibung nganong siya pa gihapon ang rehistradong tag-iya. Nga napalit na man unta ni Binay og P1.3 milyones ang iyang 2.9 ka ektarya nga luna niadtong 2004.

* * *

Bisan ang pag-atubang sa Senate Blue Ribbon subcommittee sa negosyanteng si Antonio Tiu nakapasamot lang hinuon sa kalibog. Samtang nangangkon nga maoy tag-iya sa asyenda nga gitumbok nga iya ni Binay, napakyas si Tiu pagpakita og titulo ug ubang mga dokumento pagmatuod sa iyang pagpanag-iya sa luna.

Namantsahan ang kakatuohan sa pangangkon ni Tiu nga malampuson siyang negosyante ug busa di mahimong itoy lang ni Binay tungod sa pagkabisto sa kasuod sa mga sakop sa iyang pamilya sa pamolitika sa mga Binay. Nabantang nga dakong bakak ang paneguro ni Binay nga di sila suod dihang nabisto nga ang Pamilyang Tiu maoy labing dako og amot sa iyang kampanya niadtong 2010.

* * *

Dakong buslot sa pagdupa ni Tiu kang Binay wa maggikan sa mga senador ug whistleblowers. Kun dili sa mga dokumento gikan sa Provincial Assessor’s Office sa Batangas: Ang Sunchamp Real Estate Development Corp. ni Tiu nanag-iya og usa ra ka ektarya nga luna sa Rosario, Batangas; ug nga ang tanan niyang giangkon nga mga istruktura pulos nahimutang sa mga luna nga gipanag-iya pa sa mga tawong ginganlan sa ibabaw.

Nagkadugay nagkalawom ang gahong ni Binay. Iyang hagit nga motambong lang sa imbestigasyon kun dapiton sa tibuok Senate Blue Ribbon Committee gipunit dayong Senador TG Guingona. Atubangan sa imbitasyon nga iyang gipangandoy ug sa 79% sa mga Pilipinhon nga niawhag niya pag-atubang sa mga senador, wa nay laing kapilian si Binay gawas sa pagpangunay pagpanalipod sa iyang kaugalingon. [email protected]