Nipiyait na ang kampo sa mga Binay. Nanobra na kuno ang pagpangatake batok sa bise presidente ug di’ maayo nga kini magpadayon. Gikan sa gikuwestiyon nga Makati City Hall parking building 2 ug hangtud sa gitawag nga Binay Estate.
Gitataw sa mga Binay nga wa’y igong sukaranan ang tanan aron nga iduot sila sa maong mga kontrobersiya. Ang kanunay nga pasangil sa mga Binay nga wa’y igong ebidensiya nga magpamatuod sa mga pasangil. Nakalimot ang mga Binay nga ang nikanta niini’ng tanan mao ang labing suod nga sinaligan nila’ng si kanhi Vice Mayor Ernesto Mercado.
Karon, kanunay’ng gibanatan sa kampo sa mga Binay si Mercado aron sa pagguba sa kredibilidad sa maong testigo. Nakalimot ang mga Binay nga dugay na’ng giangkon ni Mercado nga dili siya anghel nga niatubang sa senado apan usa siya sa mga tawo nga utok niini’ng giingong grabe’ng kurapsyon sa Makati uban ni Bise Presidente Binay.
Si Mercado na ang niingon daan nga dili siya limpyo niini’ng mga isyu sa kurapsyon tungod kay siya mismo nakabenepisyo ‘sab sa pagbulsa sa giingong kapin sa bilyon ka pesos nga proyekto. Dili anghel si Mercado apan ang maong kamatuoran ang naghatag niya og mas lig-ong kredibilidad sa pagbutyag sa giingong kahiwian. Desperado nga lakang ang gihimo ni Binay nga dauton ang mga tawo nga nag-utingkay sa ilang giingong mga “baho.”
Kini ang labing praktikal nga himuon aron nga maguba ang kredibilidad sa mga testigo. Apan unsa pa may gub-on nga kaligdong nga sa bisan sa unang higayon nga niatubang sa senado, daan na man nga giangkon ni Mercado nga sad-an usab siya tungod kay kakunsabo siya sa mga Binay.
Wa’ nay laing maayo’ng himuon ang mga Binay gawas na lang siguro sa pagpakita ‘sab og mga dokumento nga maoy magpatuod nga dili tinuod ang pasangil batok kaniya. Apan hangtud nga kutob lang si Binay sa pag-ingon nga pamulitika kining tanan, delikado kaayo nga si Binay tugyanan paghupot sa labing taas nga posisyon sa nasud.
Nakalimot si Binay nga ang nakalingaw sa pulitika sa Pilipinas mao ang pagnilabayay og “baho” tali sa mga politiko. Ug mao ni ang gihimo nila karon nga mga nalambigit sa isyu. Nag-iyahay sila sa pag-utingkay sa ilang mga baho. Usa kini ka maayong tilimad-on tungod kay naghatag ni og kahigayonan sa publiko sa pagsusi sa ilang mga tinagoan. Ug sa maong proseso, mas hubo ang mga politiko nga moatubang sa publiko nga mohukom kun angay ba sila nga pilion.
Email: ricolucena@yahoo.com or ricolucena@ilovecomarts.com