Unsa may makita nato sa palibot, ning kalibutana nga atong gipuy-an, bisan ang atong kinabuhi, ang kahitas-an niana ang may pagbuot. Ngano kita gibuhat nga tawo? Aron kita makaila sa Magbubuhat ug usab atong alagaran, nga siya ang Dios nga gamhanan sa nga tanan. Nga ang tanang butang iyang gipahinungod kanato, alang sa atong mga panginahanglan sa kinabuhi.
Iya gihapong kabubot-on, ang panghitabo sa plano nato ning kinabuhia. Siya man ang may pagbuot kun unsay itugot nga katumanan sa pangandoy.
Tungod kay iya usab ang pagbuot nga kahatagan kita’g kahibalo sa pagbaton og kaalam nga makaila sa katarong ug kadautan.
Aduna siya’y giya o tamdanan nga atong subayon. Pagbuot sa Dios nga hatagan kita’g kagawasan, kun unsay gusto nato sa kinabuhi. Apan gisugyot Niya, ang katarong mas angay maoy pilion, aron makatagamtam kita og kinabuhi nga tugob sa kalipay. May saad pang hatagan kita kun mangayo.
Apan kun maoy gusto nato ang kadautan, pagbuot gihapon sa kahitas-an, ang masinati natong epekto sa dili pagsunod sa iyang kabubut-on. Mag-antos kita sa kasakit nga way kinutoban. Mahidan-ok kita sa katawhan nga pulos nalumsan sa paglaum. Kanunay gihasol ang kinabuhi nga bisan sa daghan nga bahanding naangkon apan ang konsensiya gihamok nga wala pakatulga.
Apan iya gihapong kabubut-on, nga kahatagan kita higayon sa pagbag-o, samtang di pa ulahi ang tanan, mangamuyo kita’g maghinulsol nga matinud-anon. Sugdan karon dayon ug dili unya, kay wala kita masayod, kanus-a bawion sa Dios ang hinulaman nga kinabuhi, nga mao ang atong pagpahulay.