Sukad nibuto ang mga akusasyon kabahin sa lapad nga katigayonan ni Bise Presidente Jejomar Binay, wa’ tay laing nadunggan nga tubag gawas sa pag-ingon nga pamulitika lang kining tanan.
Gikan sa giingon’g gipaburot nga budget sa Makati City hall parking building 2 hangtud na sa giingon’g Binay Estate sa Batangas, ang habig sa mga Binay mao ra g’yud ang pag-ingon nga pagpanaot lang ning tanan.
Ug bisan sa sunod-sunod nga imbestigasyon nga gihimo sa senado, wa’y bise presidente nga mipatim-aw aron sa paglimpyo sa iyang ngalan. Ang normal nga mahitabo mao nga kun adunay mga tawo nga magpasipa’ sa imong dungog nga imong giprotektahan, dili kaabtan og buntag ug imo na’ng gidabu-dabuhan ang maong mga tawo aron lang sa paglimpyo sa imong bansagon.
Apan wa’ kini gihimo sa mga Binay. Inay tubagon ang tanang mga akusasyon batok nila, ang ila ra g’yung tubag—pamolitika ning tanan. Ning bag-o ilang gibutyag ang giingong grabe’ng pagmani-obra nga gihimo sa kampo ni DILG Secretary Mar Roxas, nga gihugon-hugon nga maoy mosakbang ni Binay sa pagka-presidente sa 2016.
Pagkadakong palpak ning gihimong rason sa mga Binay nga pagpangdaot lang sa ilang dungog kini’ng tanan nga mga akusasyon. Nakalimot si Binay nga kabahin na sa politika sa bisan asa’ng demokratikong nasud sa kalibutan ang pagdaot sa mga kaatbang sa politika.
Kun tinuod man ang pagduda sa kampo ni Binay nga gidaot lang sila sa kampo ni Roxas, angay pa ba ‘tang matingala?
Ang tubag—dili! Bisan unsa pa’ng pagpanghimakak ang buhian sa mga Binay, di’ kini makapapas sa nagkalapad nga akusasyon kabahin sa katigayonan sa mga Binay.
Yano ra ang isyu. Ang atong bise presidente, nahibaw-an nga nagbaton diay og kwestyonable nga mga katigayonan nga daw gitago kanato sukad siya nilingkod ug naghupot og posisyon sa gobiyerno su’d na sa halos tulo ka dekada.
Kini lang ang mga isyu’ng angayan niyang tubagon. Ug bisan unsay pasangil ug pagpamahid sa baho ang iyang himuon, di’ kini igo aron mahatagan og linaw ang daghan nato’ng pangutana kabahin sa katigayunan sa ilang pamilya.
Inay moingon ang mga Binay nga gihimo ning tanan aron lang birahon siya sa ubos aron pagpakgang sa iyang taas nga trust rating ug sa iyang ambisyon nga mahimong sunod nga presidente, mas maayo pa’ng utingkayon ‘sab sa mga Binay ang baho sa iyang mga kaatbang sa politika.
Sa maong punto, kita pa ang bulahan sa kauwahian tungod kay atong mahibaw-an kinsa g’yud nila ang mas tarong, ligdong ug matinud-anon nga mangulo sa atong nasud.
Email: ricolucena@abs-cbn.com. orricolucena@ilovecomarts.com.