Maisip nga usik lang ang minilyon ka pesos nga gigasto sa kagamhanan sa dakbayan sa Sugbo nga gipanghatag isip additional honorarium sa mga opisyal sa kabarangayan.
Tumong sa paghatag og binuwan nga tag P5 mil sa mga kapitan, P3 mil sa mga konsehal ug P2 mil sa mga treasurer ug secretary sa kabarangayan, aron nga mutabang sila sa trabaho sa dakbayan diha sa masig nila ka dapit. Ang trabaho maglakip sa pagpahapsay ug pagpanglimpyo sa ilang mga barangay, apan kun suroyon nimo ang kabarangayan makita nimo nga wala makatuman niini ang mga kapitan ug konsehal.
Kun suroyon ang kabarangayan dinhi sa urban areas, tanan nga barangay nagkagubot lang ang mga aseras nga anha unta moagi ang mga tawo apan unsaon nga gihimo na man nga “stockyard” ug butanganan sa guba nga butang sa tagbalay. Ang grupo sa City Hall nga gihinganlan og Prevention Restoration Beautification Enhancement (PROBE) wala usab makatuman sa ilang tahas kay daghang mga angayan nga ilang limpyohan apan gitan-aw lang. Ang aseras dapit sa PUJ passengers’ waiting area diha sa dalan Ramos gibutangan og mga mesitas sa tag-iya sa balay nga dili na magamit sa mga magpaabot og sakyanan.
Resulta, ang mga tawo anha na magbarog sa karsada nga maghuwat og kasakyan. Sa Barangay Suba ug Pasil mga opisyal sa barangay gahinan-aw lang nga ang aseras gihimo’ng stockyard ug ang uban giparkingan og mga traysikad.
Asa na man ang PROBE team nga gipangulohan ni Raquel Arce? Mga buta ba sila nga wala makakita niini nga talan-awon?