Dear Atty. Divine,
Duna koy pangutana may labot sa adoption. Naay anak ang akong manghod nga illegitimate ug ako ang nag-atiman ug ako ang giila nga inahan sa bata. Wa ko’y trabaho attorney apan gisuportahan ko sa akong boyfriend nga usa ka foreigner. Nagplano kami nga magminyo next year ug adto mi mopuyo sa America. Apan gusto nako nga madala ning anak sa akong igsuon busa nagplano ko nga ako na lang sagupon kay willing man ‘sab ang foreigner nga moapil sa bata sa iyang pag-petition nako. Mahimo ba ako nga mosagop og bata? Unsa may maayo nako nga buhaton? -Lucy
Dear Lucy,
Ubos sa atong Domestic Adoption Act of 1998, Section 4, (par.1) kini nagkanayon nga ang bisan kinsa nga Filipino citizen of legal age, maayo og binuhatan, wala makonbikto og mga kaso, ug dunay kapasidad nga mobuhi ug mopadako sa bata, kwalipikado nga mosagop og bata. Apan sa imo nga kaso kun wa kay stable nga trabaho hayan maglisud ta sa pagprobar sa Korte nga kaya nimo nga buhi-on ug hatagan sa iyang panginahanglan ang bata sama sa pagkaon, edukasyon ug uban pa. Ang maayo nimo’ng buhaton kun magminyo ka sa imong hinigugma nga langyaw sunod tuig human sa inyong kasal, kamo na lang duha ang mosagop sa bata. Kun mo-file mo og joint petition alang sa adoption, ang korte momando sa social worker sa pag-conduct og case study sa petitioner ug sa bata ug adunay mga dokumento nga kinahanglan ninyong isumiter sa social worker sama sa consent sa biological parents sa bata. Kun maaprobahan sa korte ang adoption then ang maong bata makonsiderar nga legitimate nga anak ninyo’ng duha ug dili siya maglisud sa pag-petition niini aron inyong madala sa America. Thanks and God Bless. - Atty. Divine
Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules ug Domingo.