Usbaw sa terminal fee

Saad sa Mactan Cebu International Airport Authority (MCIAA) nga dili mokolekta og terminal fee nga naila karon nga passenger service charge ngadto sa mga rehistradong overseas Filipino workers. Kini tungod kay adunay mga balaod nga exempted sila sa terminal fee. Mao kini gusto nako’ng maklaro tungod kay ang mga OFW nga giila nato’ng economic heroes sa nasud atong dugangan sa ilang kalisod nga nasinati sa gawas pinaagi sa pagdugang og paningil sa terminal fee.

Apan nalipay ko nga giklaro sa press statement sa MCIAA atol sa ikaduha’ng public hearing kalabot sa gisugyot nga pagpausbaw sa passenger service charge gikan sa P200 ngadto sa P300 sa domestic ug P750 gikan sa naandang P550.

Kini hinuong pagpa-usbaw sa terminal fee nagpasabot nga ang tagdumala sa airport na ang moabaga sa gastohanan sa operasyon, maintenance, ug pagpanindot sa tugpahanan. Sa ato pa, dili na magsalig ang MCIAA sa subsidy gikan sa gobiyerno nga gikuha usab gikan sa buhis sa mga tawo sa higayon nga adunay ayuhon, pagpalapad ug ubang proyekto.

Barato ra hinuon kini ikomparar sa terminal fee sa mga tugpahanan sa ubang airport. Ug mas mahal ang kape sa mga dagkong kapehan sa mga mall ug sa tugpahanan mismo kay sa balor sa usbaw nga terminal fee sa MCIAA.

* * *

Kinsay dili ganahan mosuporta sa “advocacy” sa grupong Citizens Watch nga mao ang pagpili og kandidato sa eleksiyon nga “agenda-centered” kay sa “personality-based” nga politiko.

Nahimong guest si Atty. Totol Batuhan sa 888 News Forum sa Marco Polo niadto’ng miagi’ng semana ug iyang gisaysay ang adbokasiya sa grupo nga mao ang pagtan-aw sa mabuhat ug sa kapabilidad sa politiko kay sa mga politiko nga mapili tungod sa ilang kasikat, bisan wala silay kabangkaagan sa pagdumala sa renda sa pangagamhanan.

Tinuod.  Sa amo  lang distrito sa south, ang kongresista nga si Bebot Abellanosa kutob ra g’yud sa pangangkon sa proyekto sa DPWH diha sa V. Rama. Wala gani kini rekord sa iyang pakigdebate didto sa Kongreso.

Ang nasud nagkinahanglan og kandidato nga adunay utok ug naantigohan, dili sikat nga walay mahimo gawas sa pagwarawara ra g’yud sa kamot.

Sumala pa usab ni Batuhan nga uyon usab siya’ng mausab na ang atong Konstitusyon aron adunay “political changes” ang nasud. Gani, gisugyot niya nga usbon ang Konstitusyon sa unang tuig sa mosunod administrasyon.

Kun mahatagan lang og katumanan ang gi-adbokasiya sa Citizens Watch nga reporma sa politika sa nasud, ang mga kurakot ug mga artistahon ug sikat nga personalidad nga nahimong politiko, mawad-an na og luna sa gobiyerno.