Wala’y kuwarta
Wala’y molalis nga ang dakbayan sa Sugbo nagkinahanglan og dako g’yud nga budget para sa tuig 2015 ug sa umaabot pa nga katuigan aron pagmugna og mga proyekto nga kapahimuslan sa katawhan.
Si Mayor Michael Rama gusto nga moduso og bilyon-bilyon ka pesos nga budget ngadto sa Cebu City Council nga kun mahimo pa lang, P100 bilyones, aron nga mapatuman niya ang daghang mga proyekto nga iyang gipangandoy.
Base sa balaod nga ang Annual Executive Budget sa usa ka Local Government Units (LGU) iduso sa legislative bodies sama sa konseho sa dili pa molapas ang Oktubre 16.
Mao kini ang rason nga gusto sa Team Rama nga usbon ang chairmanship sa mga komitiba diha sa City Council, ilabi na ang committee on budget and finance, kay mao man kini ang mohashas sa isumiter nga budget gikan sa Local Finance Committee.
Napanglantawan sa Team Rama nga kun dako ra kaayo ang iduso nga budget sa mayor sigurado kini nga mountol ug dili maaprobahan kun ang komitiba dumalahon ni Konsehal Margarita Osmeña gawas kun makapaniguro sila nga makolekta ang mao nga kantidad.
Sa pag-asumer ni Mayor Rama kaniadto’ng 2010, gusto dayon niya nga P11.8 bilyones ang budget sa dakbayan alang sa 2011 apan wala kini aprobahi sa konseho.
Sukad sa pag-asumer ni Rama pagka mayor wala gayud mahitabo nga ang koleksyon sa dakbayan miabot og P6 bilyones. Busa mag-unsa man ang dako nga budget nga isugyot sa mayor kun ang mao nga kantidad dili makolekta?
Nagpasabot kini nga daghan nga mga proyekto nga gidamgo nga himuon apan dili gihapon mapatuman.
Mas higpit nga pagpaningil
Tungod sa kusganong kampanya ni Presidente Noynoy Aquino batok sa pangurakot, nisaka pag-ayo ang sukaranan sa mga magbubuhis sa kaligdong sa mga naghupot sa labing tag-as nga katungdanan sa gobyerno. Di ikahibung nga bisan si Aquino naigo sa mas makuti nga pagsusi sa katawhan sa mga transaksiyon nga gisudlan sa iyang pamunoan.
Mao ni hinungdan nga mas kusganon nang ilang mga pagsaway batok sa labing dagkong opisyal sa gobyerno. Mao ni hinungdan nga mas mubo nang ilang pailob sa pag-awhag og kausaban. Ug pagpaningil nga kasilotan ang ilang gidudahan nga nakahimo og kalapasan, apil na silang Aquino ug ang iyang mga sinaligan.
* * *
Dako ning kausaban kun itandi sa pag-agwanta sa katawhan sa daghan ug dagko uyamot nga mga eskandalo nga gipasangil batok sa pamunoan ni kanhi presidente Gloria Arroyo. Napawong ang pasiunang kasibaw sa pagdemanda nga silotan ang mga nahilambigit sa minilyon ka pesos nga mga eskandalo sa NBN-ZTE ug liquid fertilizer ug ang nabistong pagpanikas sa piniliay’ng presidensiyal sa 2004 pinaagi sa Hello Garci tapes dihang nabantang nga ang hingpit nga paggawong ni Arroyo sa Kongreso nakahimong imposible sa bisan unsang tinguha sa matinud-anon nga mga imbestigasyon.
Dihang gisabotahe sa Malakanyang ang mga pakisusi sa Senado ug gibungkag ang mga protesta sa kadalanan, gipili sa mga magbubuhis ang paglingiw sa pinatuyangang kahiwian.
* * *
Mas dako ning layat sa pagpakabana sa katawhan kun itandi ang pagpangiyugpos sa kinabag-an sa katawhan atubangan sa bangis nga pagpangyatak sa tawhanong mga katungod ug pagtilok sa nasudnong panudlanan sa nagdagtom nga katuigan sa diktadurang Marcos. Apan makapahinumdom sab nato sa isog nga pag-alsa sa katawhan dihang napuno na sa mga pagpangabuso sa diktadura. Ang wa pagkatinuod sa gisaad nga kalamboan human nabanhaw ang demokratikanhong mga institusyon sa nasud mahimong mao say nakapaupos sa pailob sa katawhan. Kinsa may abundang sukaranan nga mapul-an og paabot kanus-a mapatuman ang gipasalig nga makiangayon ug malukpanong kausaban.
* * *
Kun makahigayon ka pagginhawa og lawom taliwa sa alingugngog nga mga siyagit sa pagbitay sa mga gipasanginlan, makaamgo ka nga ang pamunoang Aquino padayong gipaluyohan sa kinabag-an. Nga nisulbong pag-ayo ang mga yawyaw sa pipila ka sektor human napriso silang Arroyo ug ang mga gipasanginlan nga nangawat sa ilang pork barrel.
Katungod natong mga magbubuhis ang pagpaningil sa mga namunoan. Apan kun manglaktod sa pagsilot sa mga gidudahan, unsa may atong kalainan sa mga gitumbok nga mga malapason sa balaod? Kun tangtangon si Aquino tungod lang sa mga pasangil batok niya, kinsa may ipuli? Nga ang gitakda sa balaod nga lumbay sa mga mopuli niya—silang Bise Presidente Jejomar Binay, Senate President Franklin Drilon, House Speaker Sonny Belmonte ug Chief Justice Lourdes Sereno—naputos man sab sa mga pasangil?
- Latest
