Husto ang gihimo ni PNP Chief Alan Purisima nga miatubang na lang siya sa komitiba sa Senado nga gipangulohan ni Senador Grace Poe aron tubagon ang pagduda kaniya nga nakaangkon og mga katigayonan nga dili katumbas sa iyang suweldo.
Ang katawhang Filipino nagtutok karon niini’ng isyu nga giatubang ni Purisima ug apil na ni Vice President Jejomar Binay nga wala pa kaayo makahatag og tukma nga tubag sa gika-report nga “overpricing” sa pagpatukod sa Makati City Parking Area.
Sa pag-atubang ni Purisima sa komitiba nga gipangulohan ni Senador Poe nangangkon siya nga posible ang mihimo’g pasangil kaniya mao ang mga sakop sa sindikato nga nakulban sa kaldero tungod sa pag-estrikto niya sa mga lagda pag-angkon og lisensiya sa armas.
May posibilidad ‘sab nga tinuod, ug may posibilidad usab nga dili, apan maayo na lang kay nakahatag man siya og mahulagway nato nga lig-on nga rason.
Isip maoy labing dako nga opisyal sa kapolisan sa tibuok nasud kinahanglan nga limpyo g’yud si Purisima aron nga maangkon niya ang respeto sa katawhan.
Apan si Vice President Binay daghan sa katawhan nga nagsunod sa isyu nga naglambigit kaniya wala gayud makontento sa iyang mga tubag.
Dili basta-basta ang pasangil nga angay niya’ng tubagon apil kadto’ng giingon nga ang bidding diha sa Makati atol nga siya pa ang mayor kaniadto lutong macaw diay.
Pipila lang kini sa mga isyu nga akong nahinumdoman ni Vice President Binay ug naglaum ko nga unta moabot ang adlaw nga iya na kini nga tubagon sa publiko.
Duha na ka kaso nga administratiba ang giatubang karon ni Mayor Michael Rama didto sa Office of the President sa Malacañang. Ni’ng bag-o lang si Mayor Rama gimandoan na sa Malacañang nga mohatag siya og tubag sa kaso nga gipasaka ni Labangon Barangay Captain Victor Buendia.
Kabahin kini sa pagmando ni Rama nga gub-on ang center island ug lighting equipment sa Katipunan Street kay gihulagway sa mayor nga makahatag kini og kakuyaw sa mga motorist.
Kadto’ng usa ka kaso naglambigit sa pagpahatag ni Mayor Rama og ‘tag P20 mil ngadto sa mata’g usa sa 4,200 ka opisyal ug kawani sa City Hall isip calamity financial assistance bisan og matud sa COA wala makatagamtam og kadaot ang mao nga mga tawo sa linog ug bagyo.
Buyno, paabuton nato ang sangpotanan niini nga mga kaso.