Ok ra nang rikisahon sa sikyu ang usa ka tawo nga mosud sa mall o ba kaha atol sa usa ka seremonya publiko.
Hibawo na man ta nga ning panahuna naay mga badlungon tang kaigsuonan nga mokupot o motago og mga butang nga ginadili sa balaud.
* * *
Apan didto sa China di pa dugay nahingangha ang mga tigpaniid dihang nahibaw-an nila nga bisan langgam gidudahan nga subersibo.
Atol sa pagsaulog sa China National Day, 10,000 ka pati (doves or pigeons) ang gipaubos sa makuti nga pagrikisa sa mga kapolisan ug sikyo una kini buhi-i isip peace doves.
* * *
Suma pa sa report gikan sa Beijing, gisusi sa mga sikyu (security officers) ang mga pako sa langgam. Ug hasta pa ang lubot (anus) sa matag-usa. Gipamulikat kay kuno basig dunay mga “dangerous materials” nga napasuk o gipasuk niini.
Medyo kataw-anan apan seryoso ang mga security personnel sa kagamhanan nga maoy nagpasiugda sa maong inspeksiyon.
* * *
Ang maong talagsaong matang sa security check gihimong kataw-anang balita sa mga pamantalaan gawas sa China ug bisan pa gani ang usa ka periodiko sa Beijing mihingan sa maong inspeksiyon nga “anal checkup.”
* * *
Sa laing balita, nagpadayon ang protesta sa mga taga-Hong Kong kinsa nangayo og full democracy sa kadagkuan sa China didto sa Beijing. Wala tagda sa mga raliyista ang ultimatum nga gihatag sa Beijing. Gani mihulga na ron ang mga raliyista nga ilang sudlon ang mga importanteng opisina sa gobiyerno sa Hong Kong.
* * *
SA LAING BAHIN ... Daghan salamat sa mga Banat News readers diha sa kamerkadohan sa Lapu-Lapu, Cordova, Liloan, Consolacion ug mga kasikbit nga dapit.