Dakong tahas ang gihimo sa mga tigpasiugda sa gitawag nga ‘Green Loop’ niadto’ng Domingo.
Bisan kun nahibawo na sila’ng daan nga lanog ang reklamo nga ilang madawat human sirad-i alang sa mga sakyanan ang usa ka linya sa kadalanan.
Upat ka karsada ang gipahigayonan sa upat usab ka oras nga kalihukan - Osmeña Boulevard, Escario, Gorordo ug General Maxilom Avenue.
Yano ra ang tumong -- hatagan og higayon ang uban nga makagamit sa karsada sama sa mga nagbisikleta, mga nag-skate board ug mga naglakaw.
Ug wala tuod mosipyat, makabungog nga reklamo ang nitumaw pagkahuman sa kalihukan kay nakamugna kini og grabe’ng problema sa trapiko.
Suportado nako ang maong kalihukan. Panahon na aron hatagan usab og katungod sa kadalanan ang mga tawo nga wa’y sakyanan tungod kay aduna ‘sab silay katungod niini.
Apan sama sa ubang mga proyekto nga bag-o sa publiko, mo-ani g’yud og mga pagsaway ang ingon niini’ng lakang. Maglibog lang ‘ta asa ba g’yud pusta ang katawhan.
Adto ba sa polusyon nga hatud sa mga sakyanan o sa kahimsog ug uban pang positibo’ng ikadalit sa lakang sama sa Green Loop. Ug sama sa ubang mga lakang, dili mahimong perpekto ang tanan sa una pa lang nga pagpahigayon sa maong lakang.
Kinahanglan nga tan-awon ang mga negatibo’ng punto aron nga sa sunod nga adunay susama nga kalihukan mahimo’ng dili na mausab pa ang nasugatan’g problema.
Sugyot nako nga dili himuon ang maong kalihukan sa gitawag nga ‘main thoroughfare’ sa dakbayan. Ang mga gipasirad-an nga karsada mao ang agianan sa dako’ng bul-og sa mga sakyanan, pribado man o publiko.
Mas labing maayo nga ipahigayon ang ‘Green Loop’ sa usa ka bahin sa siyudad nga dili kaayo daghan ang mga sakyanan nga moagi. Laing punto nga himuon sunod mao ang pagpahigayon niini sa mas mubo lang nga rota.
Taas ra ang halos lima ka kilometro ug nabantayan nga adunay ubang bahin nga gipasirhan sa dagan sa trapiko sa miagi’ng Domingo nga wa’ magamit o wa’y kalihukan nga gihimo.
Labaw sa tanan, mas bukas unta ang publiko sa pagdawat sa ingon niining matang sa kalihukan nga makatabang sa panglawas ug kalikupan.
Kun lugwayan lang unta ang pasensiya, adunay siguradong maabot ang maong matang sa proyekto.
Inay magyawyaw ug ipatigbabaw ang reklamo, mas maayong mohatag na lang og suhestiyon unsay praktikal nga paagi aron nga ning higayona kahatagan og higayon ang tanan nga mogamit sa karsada ug dili ang mga garbuso’ng motorista.
(Email: rico_lucena@abs-cbn.com or ricolucena@yahoo.com)