Way orihinal nga dokumento

Dear Atty. Divine,

Usa ako sa imong suki nga tigbasahan sa imong lindog dinhi sa Banat News. Aduna lang ako’y pangutana attorney bahin  sa Insurance sa akong manghod. Nadisgrasya siya Atty. niadto pang Mayo 2014  sakay sa iyang motorcycle ug nadasmagan siya ug laing motor, adunay bali ang iyang tuong tiil Atty. ug hangtod karon wala pa gyud siya kabalik sa iyang trabaho kay gi-stainless pa man. Aduna siya’y insurance sa iyang kompanya nga gitrabahoan ug naka-claim siya, karon Atty. ni try mi og claim sa insurance sa iyang motor gibalibaran man mi kay kinahanglan man kuno nga mga original ang mga documents nga ipresentar para makakuha og claim, ang mga original Atty. amo na nga na-submit dito sa insurance sa kompanya nga iyang gitrabahoan. Ang akong pangutana Atty. kun dili ba diay mi pwede nga maka-claim bisan og mga photo copy  na lang ang among dokumento? Unsa may angay namo nga buhaton Atty. ? Daghan salamat Atty. ug maghulat mi sa imong tubag. - Ramon

Dear Ramon,

Kun mo-claim ka sa insurance normal gyud na nga mangita sila sa mga original receipts ug original nga mga medical records ug mga resita. Kun wa ka nay mga original nga kopya sa mga medical records og uban pang mga dokumento nga kinahanglan nimong isumiter mamahimo kang mobalik sa hospital diin na-admit ang imong manghud aron mangayo og laing kopya sa mga dokumento nga imong gikinahanglan. Kun wa nay original mamahimo sab nga certified true copy ang imong pangayuon gikan kanila. Kanang hospital naa gyud nay records sa tanan nilang pasyente so mas maayo nga imong balikon ang hospital ug mangayo ka sa maong mga dokumento aron pag-claim sa iyang insurance. Thanks and God Bless. - Atty. Divine

 Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo