Tulunghaan sa Jagobiao gitabangan

Ang gipahigayon nga upgrading sa electrical system sa Leonard Wood Elementary School sa Barangay Jagobiao, Dakbayan sa Mandaue nga gihimo sa Visayan Electric Company (VECO),  hingpit na nga nahuman ug napahimuslan na kini karong panahona sa mga tinun-an.

Sa Joverlie Canoy nga maoy principal sa maong tulunghaan miingon nga nahimong adopted sa VECO ang ilang tulunghaan  sulod na sa lima ka tuig nga nakalabay ug  gipatukod na usab niini ang usa sa ilang edipisyo ug gihulipan usab og mga bag-o ang karaan nilang mga lingkoranan.

Si Canoy sa iyang pagbukas sa maong kalihokan iyang gipadayag ang pagpasalamat sa gipakitang dako kaayong pagtabang sa VECO sa ilang tulunghaan nga hingpit usab nga napahimuslan sa kabataan nga nagtungha niini. 

Matud pa ni Canoy nga ang 13 nila ka mga lawak saringan sa ilang tulunghaan ang gibag-o usab ang mga electrical wiring  nga gihimo gihapon  sa  VECO nga libre ug gihimo ang turn over ceremony niadtong miaging adlaw.

Dugang pa ni Canoy nga si Anton Mari Perdices nga maoy senior vice president sa VECO maoy mitambong sa gipahigayon nga turn-over ceremony ug pipila ka mga kawani nga kauban niini.

Si Mandaue City Councilor Emmarie Lollipop Ouano Dizon nga gidapit sa pagtambong sa turnover ceremony   mipadayag usab og kahinangop sa gipakitang kaayo sa kadagkoan sa VECO sa pagtabang alang sa pagpalambo sa mga publikong tulunghaan.

Si Dr. Virginia Zapanta nga maoy schools division superintendent sa Department of Education (DepEd) mao usab ang nangulo sa pagtambong sa kalihokan uban nila ni Jagobiao Barangay Captain Edita Montesa ug mga barangay konsehal niini.