“Sidewalk casinos”

Ang mga lumolupyo sa dakbayan sa Caloocan mialsa batok sa giingon nilang “sidewalk casinos” sa ilang dapit. Ug mihangyo sila sa ilang kagamhanan nga puhagon ang maong kalihukan.

* * *

Kining “sidewalk casinos” nga ilang gihisgutan mipasabot kini sa mga sugalan sa dakbayan diin nalambigit ang daghang mga katalirungan o managsilingan. Duna sad baya kita’y susamang “sidewalk casinos” dinhi sa ato diin ang mga matang sa sugal milangkub og hantak, tong-its, mahjong, ug uban pa.

* * *

Kasagaran sa mga mangapil ning maong mga “sidewalk casinos” mga managsilingan lakip na ang mga way trabaho kinsa namasin nga makakuwarta, mga batan-on, mga inahan pa gani.

* * *

Kining maong mga “sidewalk casinos” maoy “breeding places” kon dapit liwatanan sa mga dautang elemento sa katilingban, suma pa sa usa ka civic leader nga atong nailhan. Dinhi kuno mangahimong kawatan, holdaper, ug uban pang matang sa krimen ang kabatan-onan. Anhi sad kuno “matawo” ang pagkamubo’g lupad sa pipila sa atong kababayen-an nga nahisalaag.

* * *

Sa mga interbiyu nga gipahigayon ngadto sa mga piniriso sa mga sakop sa usa ka relihiyosong “anti-gambling ministry” nahibaw-an nga kadaghanan sa mga binilanggo mga “produkto” sa mga sugalan sa ilang gipuy-ang balangay.

* * *

Dili na tingali kinahanglan pang awhagon ang mga opisyal nga hingtungdan nga angay hunungon ang kalihukan sa mga “sidewalk casinos.” Sayud na sila nga angay gayud.

* * *

SA LAING BAHIN ... Maayong adlaw diha sa atong mga magbabasa ning Banat News sa Guadalupe ug kasikbit nga mga dapit. Daghang salamat sa inyong nagpadayong suporta ning atong Banat News.